Вы тут

"Белнафтахім" — аб росце коштаў на бензін: мы дзейнічаем на баку спажыўца

Уладзімір Сізоў. Фота "Белнафтахіма"

Цяперашнія кошты на паліва на АЗС усё яшчэ не дазваляюць кампенсаваць выдаткі на куплю нафты. Пра гэта намеснік старшыні канцэрна "Белнафтахім" Уладзімір Сізоў заявіў у інтэрв'ю БЕЛТА.

Спецыяліст адзначыў, што кошт нафты сёлета вырас больш, чым кошт аўтамабільнага паліва ў Беларусі. У выніку гэта прывяло да таго, што фінансавай нагрузка на нафтаперапрацоўчую галіну ўзмацнілася. Па словах Сізова, "Белнафтахім" стараецца павышаць кошты паступова. "Вы бачыце стратэгію — плаўнае павышэнне на 1 капейку. Некаторыя крытыкуюць канцэрн "Белнафтахім" за рост коштаў на АЗС. Хачу звярнуць увагу, што ў дадзеным выпадку канцэрн дзейнічае на баку спажыўца, абмяжоўваючы рост коштаў значна больш нізкім узроўнем, чым гэта неабходна НПЗ для вядзення рэнтабельнай вытворчай дзейнасці і мадэрнізацыі", — адказаў ён на крытыку. 

Апошнія месяцы "Белнафтахім" амаль кожны тыдзень падымае кошт на паліва на 1 капейку. Такім чынам за апошнія тры месяцы кошты выраслі ўжо на 12 капеек. 

Сізоў заклікае аўтамабілістаў да разумення сітуацыі: "Вытворца цяпер не можа сам пакрываць ўсе страты ад пастаўкі нафтапрадуктаў на ўнутраны рынак. Спажывец таксама павінен адчуваць змененыя ўмовы паставак сыравіны". У іншым разе, кажа ён, заводы проста не змогуць развівацца. 

Далейшае павышэнне коштаў на паліва будзе залежаць ад становішча на НПЗ. За час вялікіх коштаў на сыравіну і нізкіх коштаў на паліва на ўнутраным рынку ў прадпрыемстваў назапасіліся фінансавыя страты. "Пакуль мы не бачым, што дасягнулі таго ўзроўню цаны, які дазваляе кампенсаваць ўзрослыя выдаткі на куплю нафты", — кажа Сізоў. Яшчэ адзным адмоўным фактарам, па яго словах, будзе анансаваны Расіяй падатковы манеўр.