Беларускае войска пачало трэніравацца пераходзіць з мірнага часу на ваенны
Узброеныя сілы Беларусі пачалі трэніравацца пераходзіць з мірнага часу на ваенны. Мінабароны патлумачыла, што заняткі па баявой гатоўнасці праводзяцца пасля чарговага прызыву на вайсковую службу.
“Агульная накіраванасць заключаецца ў правядзенні комплексу паслядоўных трэніровак з усімі катэгорыямі ваеннаслужачых, падраздзяленнямі, воінскімі часцямі, злучэннямі, органамі ваеннага кіравання”, — сказалі ў ведамстве.
Тым часам за падобнымі трэніроўкамі ўважліва сочаць за мяжой. Пра сённяшняе паведамленне Мінабароны РБ напісала Reuters. Інфармагенцтва дадае, што "Беларусь з'яўляецца блізкім саюзнікам Расіі і дазволіла ёй пачаць паўночны этап свайго нападу на Украіну 24 лютага з беларускай тэрыторыі".
