Ажароўскі пра чарговы інцыдэнт з рэактарам: Спачатку мусілі правезці макет
![Ажароўскі пра чарговы інцыдэнт з рэактарам: Спачатку мусілі правезці макет](/sites/default/files/styles/gallery_main/public/2023-08/ozh.jpg.webp?itok=2q6Fbz59)
Чарговы інцыдэнт з рэактарам для беларускай АЭС. “Нязначны дотык” пры транспарціроўцы адбыўся, калі яго везлі чыгункай на будаўнічую пляцоўку.
Як паведамляюць Еўрарадыё у Дырэкцыі будаўніцтва БелАЭС, адбыўся “нязначны дотык ахоўнага металічнага транспартнага кажуха звышгабарытнага грузу (корпуса рэактара для Беларускай АЭС) да апоры кантактнай сеткі”.
Па словах эколага і эксперта Андрэя Ажароўскага, перад транспарціроўкай корпуса рэактара мусілі пусціць макет.
Андрэй Ажароўскі: “Мінулы корпус быў пашкоджаны настолькі, што яго прыйшлося замяняць. Цяпер незразумела, куды урэзаўся гэты, на якой хуткасці? Перад транспарціроўкай грузу пускаюць макет па памерах грузу. І калі не так разлічылі, то ён закране апоры. Няўжо так спяшаліся, што забыліся гэта зрабіць. Што цяпер з корпусам, сказаць нельга”.
Са словаў відавочцаў, у Барысаве на чыгунцы ўсё ж рабілі драўляны макет, але ўжо пасля інцыдэнту.
Эксперт заўважае, што мяняць корпус рэактара вельмі дорага і гэтым разам грошы могуць скончыцца. Мінулы раз, улетку, корпус рэактара для БелАЭС “саслізнуў на грунт з вышыні некалькіх метраў”. Цяпер “нязначна датыкнуўся” іншы корпус, які прыехаў на замену папярэдняму.