Апошняе графіці на “сцяне Шчоткінай” пратрымалася рэкордны час
Надпіс “Хто дазволіў усім астатнім самім сабе дазваляць”, які з’явіўся на “сцяне Шчоткінай” на мінулых выхадных, замалявалі толькі ў сераду 19 красавіка. Гэта абсалютны рэкорд для сацыяльных графіці на бетонным плоце ў раёне будынка па вуліцы Карла Маркса, 11 у Мінску. Невядомыя нават паспелі пераўтварыць графіці ў дошку аб’яваў, прапанаваўшы пакупку любых манет, грашовыя крэдыты і прыём золата.
Сваю назву “сцяна Шчоткінай” атрымала, дзякуючы першаму графіці — партрэту экс-міністра працы Марыяны Шчоткінай з надпісам, што гэта яна прыдумала падатак на беспрацоўе. Калі работнікі ЖЭСа знішчылі гэты партрэт, на яго месцы з'явіўся надпіс "Вы ж самі ўсё разумееце". З таго часу невядомыя графіцісты стала спаборнічаюць з ЖЭСам. На сцяне ўжо з'яўляліся партрэты старшыні Савета Рэспублікі Міхаіла Мясніковіча і фраза Марціна Лютара Кінга "Ніколі не забывайце: усё, што рабіў Гітлер у Германіі, было законным". Але ўсе яны замалёўваліся ўжо на наступны дзень пасля з’яўлення.
У іншых месцах горада невядомыя мастакі таксама размяшчалі сацыяльныя графіці: напрыклад, міністра ўнутраных спраў Ігара Шуневіча ў форме НКУС, старшыні Белдзяржтэлерадыёкампаніі Генадзя Давыдзькі — у вобразе тэлепузіка і іншыя.
Заўважыўшы журналіста Еўрарадыё, супрацоўніца ЖЭС павярнулася і спыталася навошта той яе фатаграфуе. А потым дадала: "Мяне ўжо і так пяць разоў у інтэрнэце паказвалі"!
