Андрэй Бастунец: Чакаем новых абмежаванняў інтэрнэту!

Днямі старшыня КДБ Вадзім Зайцаў заявіў, што “рэцэпты” выбуховых рэчываў для тэракту ў мінскім метро злачынцы знайшлі з дапамогай інтэрнэту. На думку праваабаронцаў, гэтае выказванне можна расцэньваць як чарговы “трывожны званочак” — знак таго, што за беларускімі карыстальнікамі сусветнага сеціва неўзабаве могуць усталяваць яшчэ больш пільны кантроль.

“Глебу для абмежаванняў у інтэрнэце рыхтуюць дастаткова доўга, — мяркуе юрыст, намеснік старшыні ГА “Беларуская асацыяцыя журналістаў”. Андрэй Бастунец. — Цягам года гэтая глеба актыўна культывуецца. І таму, пасля такіх заяваў, пасля гэтага чакаем новых: і прававых, і не прававых — абмежаванняў у гэтай галіне”.

Не так складана і сказаць, чаго канкрэтна на гэты раз чакаць інтэрнэт-карыстальнікам.

Андрэй Бастунец: “Усе заканадаўчыя акты, якія дзейнічаюць у краіне, датычацца і распаўсюду інфармацыі ў інтэрнэце. Акрамя закону аб СМІ. Бо пакуль урадавая прапанова на гэты конт нераспарацаваная. Мне здаецца, што гэта можа быць такі першы захад — распаўсюд заканадаўства аб СМІ і на інтэрнэт-выданні. І тут могуць паўстаць вельмі вялікія цяжкасці ў іх працы. А другое — гэта больш шчыльная праца праваахоўных органаў з інтэрнэт-рэсурсамі і прыцягненне да адказнасці у выглядзе папярэджванняў ці ў выглядзе крымінальных артыкулаў. Як дарэчы, часткова з Пачобутам адбываецца”.

Інтэрнэт-выданні ў гэтай сітуацыі мусяць, як кажуць, ратаваць сябе самі. Мусіць узрастаць прафесіяналізм іх супрацоўнікаў. Мусіць узрастаць адчуванне таго, што ў дачыненні сеціўных рэсурсаў могуць узнікаць пэўныя прававыя пытанні. Абараніць Байнэт можна і іншымі спосабамі.

Андрэй Бастунец: “Ёсць 3 шляхі магчымага ўздзеяння. Гэта, найперш, шлях палітычны, з дапамогай нашых замежных калегаў, праваабаронцаў, міжнародных структураў, якія б маглі паўплываць каб заканадаўства ў Беларусі ў галіне інтэрнэту развівалася ў нармалёвым кірунку. Другі накірунак — гэта прававая праца. Мы яе ўжо вядзем: звярталіся і ў Палату прадстаўнікоў, у Міністэрства інфармацыі з пытаннямі, каб абмеркаваць заканадаўства аб СМІ і вынесці яго ў публічную прастору”.

А трэці шлях, які меў на ўвазе намстаршыні БАЖ Андрэй Бастунец — гэта праваабарончая дзейнасць. Напісанне скаргаў, удзел у спрэчках і гэтак далей.