Зяленскі зрабіў фота разам з ветэранам савецкага войска і сувязной УПА
Уладзімір Зяленскі зрабіў фота разам з ветэранам савецкага войска і сувязной УПА. Новаабраны ўкраінскі прэзідэнт адзначыў, што трэба ўшаноўваць усіх, хто змагаўся супраць нацызму і загінуў за Украіну ў гады Другой сусветнай вайны. Ва Украіне, як і ў многіх краінах Еўропы, 8 траўня адзначаўся Дзень памяці і прымірэння.
Ветэран вайны на фота — гэта Іван Залужны, якому 10 траўня споўніцца 101 год. Ваяваў у марской пяхоце. Залужны страціў адзінага ўнука падчас вайны на Данбасе, адзначае Зяленскі.
Сувязная УПА — Параскева Зелянчук-Пацяк. Яна стала дапамагаць паўстанцам у 13 гадоў, перадавала ім інфармацыю, прадукты.
Уладзімір Зяленскі піша на сваёй старонцы ў Facebook, што Украіне сёння патрэбны мір, "зарукай якога стане еднасць усіх украінцаў". "Для таго, каб у будучыні нас аб'ядноўвалі толькі перамогі", — такімі словамі новаабраны прэзідэнт Украіны скончыў свой каментар да здымка.
