Зяленскі назваў умовы перамоваў з Расіяй — 265-я раніца вайны
![Уладзімір Зяленскі / @V_Zelenskiy_official](/sites/default/files/styles/gallery_main/public/2023-08/ze_15_11.jpg.webp?itok=gYO6CUhn)
Уладзімір Зяленскі / @V_Zelenskiy_official
Прэзідэнт Украіны Уладзімір Зяленскі выступіў у рэжыме відэасувязі перад лідарамі "Вялікай дваццаткі". Сустрэча ў гэтыя дні праходзіць на інданезійскім востраве Балі. Зяленскі казаў аб умовах, пры якіх вайна можа быць спыненая.
"Не варта прапаноўваць Украіне кампрамісы з сумленнем, суверэнітэтам, тэрыторыяй і незалежнасцю. Мы паважаем правілы, і мы Людзі слова. Украіна заўсёды была лідарам міратворчых намаганняў, і свет гэта бачыў. І калі Расія кажа, што нібыта хоча скончыць гэтую вайну, хай дакажа гэта дзеяннямі", — заявіў Зяленскі.
Украінская формула міру, па яго словах, уключае ў сябе шэраг рашэнняў, у тым ліку, аднаўлення тэрытарыяльнай цэласнасці Украіны, вывад расійскіх войскаў і спыненні баявых дзеянняў. Ён таксама адзначыў, што не мае намеру даваць Расіі магчымасці "перачакаць, нарасціць сілы, а затым пачаць новую серыю тэрору і глабальнай дэстабілізацыі".
"Не будзе ніякіх "Мінск-3", якія Расія парушыць адразу ж пасля заключэння", — заявіў Зяленскі.
Аб немагчымасці ніякіх кампрамісаў — перамовы толькі пасля вываду войскаў — казаў напярэдадні і галоўнакамандуючы УСУ Валерый Залужны амерыканскаму калегу генералу Марку Мілі. Яны размаўлялі па тэлефоне. "Украінскія вайскоўцы не прымуць ніякіх перамоваў, дамоўленасцей або кампрамісных рашэнняў. Умова для перамоваў адна — Расія павінна пакінуць усе захопленыя тэрыторыі", — заявіў Залужны. Выданне The New York Times днямі пісала, што генерал Мілі выступае за перамовы паміж Расіяй і Украінай.
Расіяне ўладкоўваюць абарончыя межы на левым беразе Дняпра і спрабуюць утрымацца на часова акупаваных тэрыторыях. Атакуюць і спрабуюць наступаць у Данецкай і Луганскай абласцях — на Бахмуцкім, Аўдзееўскім і Навопаўлаўскім напрамках. Пра гэта гаворыцца ў ранішняй зводцы Генеральнага штаба УСУ.
У амерыканскім Інстытуце вывучэння вайны (ISW) адзначаюць, што Міністэрства абароны Расіі у апошнія дні "узмацніла заявы аб тэрытарыяльных захопах Расіі ў Данецкай вобласці, верагодна, каб падкрэсліць, што расійскія войскі актывізуюць аперацыі ў Данецкай вобласці пасля вываду войскаў з правабярэжжа Херсонскай вобласці". Так, Мінабароны РФ заявіла, што расійскія войскі 13 лістапада захапілі Маёрск (у 20 км на поўдзень ад Бахмута), 14 лістапада Паўлаўку ( у 45 км на паўднёвы захад ад Данецка). Адзначым, што Маёрск і Паўлаўка зніклі з паведамленняў ўкраінскага Генштаба, хоць раней ўкраінскія ваенныя перыядычна паведамлялі аб баях ля гэтых населеных пунктаў.
Паводле ацэнкі ISW, у бліжэйшы час можна чакаць актывізацыі аперацый вакол Бахмута і Данецка. "Расійскія войскі, верагодна, даб'юцца поспехаў у гэтых раёнах у бліжэйшыя дні і тыдні, але гэтыя поспехі наўрад ці будуць значнымі ў аператыўным дачыненні", — лічаць эксперты.
![Зеленский назвал условия переговоров с Россией — 265-е утро войны](/sites/default/files/styles/default_image_paragraph/public/paragraphs/image/map_15_11.jpg.webp?itok=XrXeo7kB)
Еўрапарламент на наступным тыдні разгледзіць рэзалюцыю аб прызнанні Расіі тэрарыстычнай дзяржавай. Найбуйнейшая дэпутацкая група Еўрапарламента, Еўрапейская народная партыя (ЕНП), заявіла, што падтрымае гэты дакумент. Пра гэта паведаміла прэс-служба партыі
Міжнароднае агенцтва па атамнай энергіі (МАГАТЭ) у бліжэйшыя тыдні адправіць місіі па ядзернай бяспецы на тры працоўныя атамныя электрастанцыі ва Украіне (Южнаўкраінск, Хмяльніцкую і Ровенскую), а таксама ў Чарнобыль. Гэта была просьба Кіева. Пра гэта паведаміў гендырэктар МАГАТЭ Рафаэль Гросі. Кожная місія будзе доўжыцца каля тыдня.
Жыхароў Марыупаля чакае вельмі складаная зіма, кажа кіраўнік Данецкай абласной адміністрацыі Павел Кірыленка. Горад застаецца пад расійскай акупацыяй, і расіяне далі жыллё не больш чым 1 тысячы чалавек, хоць у горадзе пражывае больш за 100 тысяч.
"Камунікацыі ўсе разбітыя, больш за палову шматкватэрнага жылога фонду страціла ўнутраныя камунікацыі. Таму зіма для людзей будзе вельмі складанай: без цяпла, электрычнасці і водазабеспячэння", — папярэдзіў Павел Кірыленка. Паводле ацэнак ААН, у выніку баёў у горадзе пашкоджаныя або разбураныя да 90% жылых будынкаў і да 60% прыватных дамоў. 350 тысяч чалавек вымушана пакінулі Марыупаль. Да вайны тут жылі 426 тысяч чалавек.
![Зеленский назвал условия переговоров с Россией — 265-е утро войны](/sites/default/files/styles/default_image_paragraph/public/paragraphs/image/mariup_15_11.jpg.webp?itok=37yb8y9B)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.