Жыхару Мінска прысудзілі пяць гадоў "хіміі" за каментары пра міліцыю
Аляксей Ліпень пасля абвяшчэння прысуду / belsat.eu
Пацярпелымі па справе праходзілі больш за 10 міліцыянтаў.
На пяць гадоў "хіміі" асудзіў суд Заводскага раёна Мінска Аляксея Ліпеня. Мужчыну прызналі вінаватым па двух артыкулах Крымінальнага кодэкса — арт. 369 (публічныя абразы прадстаўніка ўлады) і арт. 364 (пагроза прымянення гвалту ў дачыненні да супрацоўніка АУС), паведамляюць праваабаронцы.
Судзілі яго, па сутнасці, за каментары ў адным з тэлеграм-каналаў. Следства палічыла, што Ліпень "сваімі дзеяннямі прынізіў гонар і годнасць супрацоўнікаў міліцыі як прадстаўнікоў улады і як людзей, а таксама падарваў аўтарытэт дзяржаўнай улады".
Акрамя таго, у яго каментарах убачылі прыкметы пагрозы ў адрас некалькіх міліцыянтаў. Усяго па справе праходзілі пацярпелымі больш за 10 супрацоўнікаў міліцыі.
Падчас разгляду справы сілавікі казалі, што адчуваюць сябе абражанымі. Кожны з іх заявіў, што пацярпеў маральна, вымушаны рэагаваць на званкі сяброў, якія прачыталі каментары, і тлумачыць.
Паводле прысуду Ліпень таксама павінен выплаціць пацярпелым кампенсацыю за маральную шкоду ў памеры 5500 рублёў.
Прысуд у сілу яшчэ не ўступіў і можа быць абскарджаны. На гэты час Ліпеня адпусцілі дадому пад падпіску аб нявыездзе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.