Жорсткія і балючыя баі за Бахмут — 384-я раніца вайны ва Украіне

Баі за Бахмут працягваюцца. Расійскія рэсурсы пішуць, што бітвы ідуць у паўночнай частцы горада, "працягваецца штурм падземных камунікацый завода апрацоўкі металаў".

Акрамя Бахмута, расіяне працягваюць наступальныя дзеянні на Ліманскім, Аўдзееўскім, Мар'інскім і Шахцёрскім напрамках. За мінулыя суткі падраздзяленні сіл абароны Украіны адбілі тут больш за 100 нападаў, гаворыцца ў ранішняй зводцы Генштаба УСУ. Расіяне здзейснілі ўчора і 5 ракетных удараў, у тым ліку і па аб'ектах грамадзянскай інфраструктуры Сумскай і Данецкай абласцей, распавядаюць украінскія вайскоўцы. Ёсць загінулыя і параненыя мірныя грамадзяне. А яшчэ расіяне нанеслі 35 авіяцыйных удараў і здзейснілі 76 абстрэлаў з рэактыўных сістэм залпавага агню.

"Вельмі жорсткімі і балючымі" назваў баі на ўсходзе Украіны прэзідэнт Уладзімір Зяленскі. Пра сітуацыю на фронце ён традыцыйна гаварыў у вячэрнім відэазвароце.

"Белагораўка і Мар'інка, Аўдзееўка і Бахмут, Угледар і Каменка — і ўсе іншыя месцы, дзе цяпер вырашаецца, якой будзе наша будучыня", — сказаў Зяленскі. Ён падзякаваў "кожнаму і кожнаму, хто цяпер у баі", у прыватнасці адзначыў байцоў 92-й асобнай механізаванай брыгады — за паспяховыя дзеянні ў раёне Бахмута.

Першая група ўкраінскіх вайскоўцаў, якія вучацца кіраваць іспанскімі танкамі Leopard 2А4, завершыць падрыхтоўку ўжо на гэтым тыдні. Пра гэта піша CNN са спасылкай на Міністэрства абароны Іспаніі.

У гэтую групу ўваходзяць 10 экіпажаў і дапаможны персанал агульнай колькасцю 55 чалавек. Яны прыбылі ў Іспанію 16 лютага, курс быў разлічаны на чатыры тыдні. Мяркуецца, што пасля гэтага курса ўкраінскія вайскоўцы змогуць працаваць з аперацыйнымі сістэмамі танка і тэхнічна яго абслугоўваць. Кожны экіпаж складаецца з камандзіра, кіроўцы, грузчыка і стралка. Акрамя таго, падрыхтоўку праходзілі 15 тэхнікаў, пяць з якіх з'яўляюцца спецыялістамі па механіцы, пяць — па электроніцы і яшчэ пяць — па ўзбраенні.

Сярод першых 55 украінскіх вайскоўца ёсьць як прафэсіяналы, так і рэзэрвісты, ва ўзросце ад 21 да 60 гадоў.

Злучаныя Штаты спрабавалі паўплываць на лідара Кітая Сі Цзіньпіна, каб ён пагаварыў з прэзідэнтам Украіны Уладзімірам Зяленскім. Пра гэта заявіў дарадца прэзідэнта ЗША ў нацыянальнай бяспецы Джэйк Саліван.

"Мы заахвочвалі прэзідэнта Сі Цзіньпіна звярнуцца да прэзідэнта Уладзіміра Зяленскага, таму што лічым, што КНР і сам прэзідэнт Сі павінны непасрэдна пачуць украінскі пункт гледжання, а не толькі расійскі", — распавёў Саліван. Паводле яго, Вашынгтон рабіў гэта публічна і ў прыватным парадку. Саліван спадзяецца, што такая размова ў выніку адбудзецца. "Гэта было б добра, таму што гэта патэнцыйна прынясе больш балансу і перспектыў", — падкрэсліў дарадца Джо Байдэна. Ён таксама дадаў, што ЗША спадзяюцца, што Кітай і ў далейшым будзе адмаўляцца ад аказання Расіі "смяротнай дапамогі".

Нагадаем, напярэдадні выданне The Wall Street Journal са спасылкай на свае крыніцы паведаміла, што лідар Кітая Сі Цзіньпін плануе пагаварыць з прэзідэнтам Украіны Уладзімірам Зяленскім упершыню пасля пачатку поўнамаштабнага ўварвання Расіі. Верагодна, размова адбудзецца пасля яго сустрэчы з Уладзімірам Пуціным у Маскве.

На наступным тыдні Еўрапейскі Саюз можа падпісаць план сумеснай закупкі боепрыпасаў для Украіны. Аднак пакуль краіны не вызначаліся з аб'ёмам і механізмам фінансавання. Пра гэта піша Bloomberg са спасылкай на крыніцы, якія знаёмыя з дыскусіямі ў ЕС.

Палітычнае рашэнне ўжо ўзгоднена, але няма кансенсусу па фінансавым пытанні — колькі грошай краіны-члены ЕС гатовыя вылучыць у гэтым годзе, і як гэтыя сродкі будуць структураваныя. Некаторыя краіны хочуць, каб абавязковае фінансаванне было прапарцыйна памеру іх эканомікі, іншыя выступаюць за добраахвотныя ўнёскі.

Тым часам у Кіеве і Кіеўскай вобласці ўчора нарэшце аднавілі электразабеспячэнне пасля апошняй расійскай атакі. Стабілізацыйныя адключэння электраэнергіі больш не прымяняюцца. Але сітуацыя ў энергасістэме застаецца складанай. Пра гэта гаворыцца ў паведамленні ДТЭК.