За пяць дзён 2015-га беларусы прынеслі ў абменнікі толькі $23 млн

З 1 да 5 студзеня ўключна беларусы прадалі валюты на чыстай аснове на 35,4 млн долараў. Фізічныя асобы пакінулі ў абменніках наяўнымі 23,6 млн долараў, а прадалі безнаяўным шляхам 11,8 млн долараў. Пра гэта паведамляе БЕЛТА са спасылкай на Нацыянальны банк Беларусі.

Як паведамляла Еўрарадыё, чысты продаж валюты насельніцтвам Беларусі з 25 да 29 снежня 2014-га склаў 52 млн 900 тысяч долараў у эквіваленце. Наяўнымі беларусы прадалі банкам 45 млн 600 тысяч долараў, безнаяўным шляхам — 7 млн 300 тысяч долараў,

За пяць згаданых дзён снежня ўклады ў беларускіх рублях у банках выраслі на 319 млрд 300 млн рублёў. За 1-5 студзеня сёлета прырост тэрміновых дэпазітаў у беларускіх рублях склаў 421,4 млрд рублёў.

Нагадаем, з 20 снежня ў Беларусі дзейнічаў 30% збор з продажу валюты. Аднак 30 снежня ён быў зніжаны да 20%, а з 6 студзеня — да 10%. Варта адзначыць, што на валютных таргах 5 студзеня курс долара вырас адразу на 840 рублёў, 6 студзеня — яшчэ на 60.

Як змяняліся курсы валют пры Ермаковай і Калаўры (інфаграфіка)

Фота: Fotolia