Ёсць падтрымка, каб супрацьстаяць рэжыму, але не выйграць барацьбу — Ціханоўская

Кіраўніца Аб'яднанага пераходнага кабінета Беларусі Святлана Ціханоўская просіць у Захаду больш увагі для нашай краіны, больш дапамогі ў барацьбе з рэжымам Аляксандра Лукашэнкі. Пра гэта яна заявіла падчас візіту ў Брусель у інтэрв'ю dw.com.

"Гэта абавязак беларусаў найперш вызваліць краіну ад дыктатуры. Але мы не дамо рады, — кажа Ціханоўская. — Нам патрэбна дапамога магутных заходніх краін. Насамрэч, мы вельмі ўдзячны за адзінства, за адзіную пазіцыю ў дачыненні Беларусі. Але, магчыма, у нас ёсць падтрымка і дапамога, каб супрацьстаяць рэжыму, але не выйграць гэтую барацьбу. Таму я прашу больш увагі для Беларусі. Не пакідайце Беларусь на "калісьці потым", бо "спачатку мы разбярэмся з іншымі праблемамі". Потым Беларусі можа і не быць! Забяруць краіну з дапамогай Лукашэнкі "з-пад носа". Але Беларусь важная для ўсяго рэгіёна, гэта цэнтр Еўропы... Толькі дэмакратычная, свабодная і суверэнная Беларусь можа стаць надзейным саюзнікам і партнёрам для заходніх краін. Дапамажыце нам!".

У тым жа інтэрв'ю Ціханоўская сказала, што "Лукашэнка шмат гадоў прадаваў незалежнасць Беларусі, кавалачак за кавалачкам". І размяшчэнне ў РБ расійскай тактычнай ядзернай зброі — яшчэ адзін такі "кавалак". А вагнераўцы ў Беларусі — "пагроза нашай незалежнасці і суверэнітэту".