Відэакамеры, якія маглі зняць выкраданне журналіста ў Тбілісі, не працавалі

Жонка выкрадзенага ў Тбілісі азербайджанскага журналіста Афгана Мухтарлы Лэйла Мустафаева й адвакат Арчыл Чапікашвілі азнаёміліся з матэрыяламі справы. Адвакат Мухтарлы сцвярджае, што відэакамеры, якія маглі зняць перамяшчэнні выкрадальнікаў Мухтарлы, не працавалі. Па словах адваката, усе гэтыя відэакамеры знаходзяцца ў падпарадкаванні Міністэрства ўнутраных спраў Грузіі, і ні на адной з іх няма запісу, піша JAMnews.

Чапікашвілі асцерагаецца, што злачынства можа застацца нераскрытым.

"Запісаў не існуе, што кажа пра тое, што першапачатковыя высновы, зробленыя намі, фактычна застаюцца ў сіле. А менавіта — расследаванне праводзілася толькі для таго, каб пра яго можна было заявіць. Без відэаматэрыялаў, без ідэнтыфікацыі транспартнага сродку, на якім быў вывезены Мухтарлы, праўду высветліць немагчыма. Нягледзячы на ​​тое, што прайшоў цэлы месяц, транспартны сродак, на якім Афган Мухтарлы з моста Бараташвілі накіраваўся ў бок дома, не ідэнтыфікаваны, і ў гэтым кірунку няма нічога новага", — заявіў Чапікашвілі.

Выданне "Паймтайм" яшчэ 19 чэрвеня паразмаўляла з нагоды гэтай справы з міністрам унутраных спраў Грузіі Гіоргій Мгебрышвілі. Чыноўнік выключыў верагоднасць удзелу супрацоўнікаў яго ведамства ў выкраданні Афгана Мухтарлы. Ён таксама заявіў, што на канфіскаваных запісах відэакамер не зафіксаваныя супрацоўнікі паліцыі ў форме.

"У цэлым, як вы думаеце, нават пры самым неверагодным развіцці падзей, крымінальная паліцыя ў форме выкрадае сярод белага дня чалавека і гэтага ніхто не бачыць?! Такая версія нават тэарэтычна недапушчальная. Разам з гэтым мы на падставе рашэння суда канфіскавалі ўсе відэазапісы лакацыі і магчымага маршруту Афгана Мухтарлы, названыя яго адвакатам, апыталі мноства людзей. З упэўненасцю магу сказаць, што на названых участках, на прылеглых да іх тэрыторыях наогул не зафіксаваныя людзі ў паліцэйскай форме", — заявіў Мгебрышвілі.

Журналіст Афган Мухтарлы перабраўся ў Грузію з Азербайджана ў 2014 годзе з-за ціску ўладаў. Некалькі яго зваротаў у Еўрапейскі суд па правах чалавека знаходзяцца ў працэсе разгляду. У апошні час ён супрацоўнічаў з міжнароднымі арганізацыямі і медыя — IWPR і Meydan.tv

Мухтарлы знік у Тбілісі 29 мая 2017 года. Пазней стала вядома, што ён знаходзіцца ў азербайджанскіх праваахоўных органах. Па словах самога Мухтарлы, яго ў Грузіі выкралі мясцовыя спецслужбы, надзелі на галаву мяшок і перадалі азербайджанскім органам. Суд Азербайджана прысудзіў Мухтарлы да папярэдняга зняволення тэрмінам на тры месяцы за незаконнае перасячэнне мяжы і ўвоз кантрабанды. Па словах Мухтарлы, на мяжы яму падкінулі дзесяць тысяч еўра.