Відэа з Газы, на якое немагчыма глядзець без слёз — #ІхНоравы

21/02/2024 - 15:31

#ІхНоравы / @rubanau_collage

Сёння мы сабралі для вас па свеце трохі кепскіх, але сапраўды важных навін.

Газа ў роспачы

Сусветная харчовая праграма ААН прыпыніла пастаўкі прадуктаў харчавання ў паўночную частку Газы праз "поўны хаос і гвалт, выкліканыя крахам грамадскага парадку".

Гэтае рашэнне далося нялёгка. ВВС публікуе кадры, на якіх відаць, як людзі ў роспачы бягуць да грузавікоў з гуманітаркай, якіх тут зусім хутка ўжо не будзе. На відэа трапіў мужчына, які збірае з зямлі прасыпаную муку. І дзіця, якое са слязамі кажа, што сумуе па хлебе.

Каму вайна…

Якім быў 2023 год? Ва Украіне — вайна. Паміж Ізраілем і Газай — вайна. А ў брытанскага вытворцы зброі BAE Systems — прыбытак. І ў наступным годзе кампанію таксама чакае прырост, піша Guardian.

Кампанія займаецца будаўніцтвам падводных лодак і знішчальнікаў, танкаў і караблёў, зброі і боепрыпасаў.

Поўнамаштабнае ўварванне Расіі ва Украіну ў 2022 годзе прымусіла ўрады многіх краін перагледзець свае вайсковыя выдаткі, і акцыі вытворцаў зброі ўзляцелі.

У справе Асанжа нічога не мяняецца

Заснавальнік Wikileaks можа быць выдадзены ЗША цягам найбліжэйшых дзён. Там яго чакае суд і абвінавачанні ў шпіянажы праз публікацыю тысяч сакрэтных вайсковых і дыпламатычных дакументаў, звязаных з войнамі ў Афганістане і Іраку.

Адвакаты Асанжа сцвярджаюць, што яго справа палітычна матываваная. ЗША спрабуюць адпомсціць яму за выкрыццё злачынстваў на дзяржаўным узроўні. І гаворка ідзе пра сур'ёзныя злачынствы — у тым ліку катаванні і пазасудовыя пакаранні смерцю.

Але адвакаты з амерыканскага боку спрабуюць пераканаць, што Асанж зусім не палітвязень, а абвінавачанні яму выстаўляюць не праз прагу помсты, а за тое, што Wikileaks заахвочваў крадзеж дакументаў і хакерства.

Акрамя таго, паводле звестак амерыканскага боку, Асанж "свядома і без разбору раскрываў свету імёны людзей, якія выступалі ў якасці крыніц інфармацыі для Злучаных Штатаў".

"Менавіта гэтыя асноўныя факты адрозніваюць пазіцыю апеллянта ад пазіцыі New York Times і іншых СМІ [якія выкарыстоўвалі злівы Wikileaks. — Еўрарадыё]", — кажуць амерыканскія адвакаты.

Цяпер рашэнне за лонданскім судом: ці дазволіць суддзя Асанжу абскардзіць папярэдняе рашэнне? І калі не, то пасля многіх гадоў уцёкаў і зняволення ў пасольстве Эквадора ён адправіцца ў ЗША, дзе яму пагражае больш за паўтары сотні гадоў зняволення.

Зноў кібермахляры

У Любліне ашуканцы выбавілі ў 84-гадовай жанчыны 30 зліткаў золата (больш за 40 тыс. долараў), піша канал Filizanka са спасылкай на польскія медыя. Але беларусы, вядома, уразіліся памерам золатавалютных рэзерваў польскіх пенсіянераў! Не крымінальная хроніка, а проста гісторыя пра тое, якой мусіць быць пенсія ў здаровай дзяржаве.

Але наогул навіна, вядома, кепская. І мы ўжо расказвалі чытачам Еўрарадыё, што рабіць, каб не стаць ахвярай махляроў (калі ласка, пакажыце гэты тэкст сваім блізкім).

Гэй, засмуткавалі? Так, сённяшні агляд выйшаў невясёлым. Але пачытайце іншыя! Мы расказваем вам і добрыя навіны!