Віцябляніну вернуць смартфон, канфіскаваны за публікацыю фота з БЧБ-сцягам
![Смартфон / pixabay.com](/sites/default/files/styles/gallery_main/public/2023-08/smartfon-3012.jpg.webp?itok=zME2bWs2)
Смартфон / pixabay.com
Віцябляніну вернуць смартфон, канфіскаваны за публікацыю ў сацсетках фота з бел-чырвона-белым сцягам. Такое рашэнне прыняў старшыня Віцебскага абласнога суда Аляксандр Федзюкевіч, пішуць "Народныя навіны Віцебска".
Справу разглядаў 22 жніўня Першамайскі суд Віцебска. Мужчыну вінавацілі ў тым, што шчэ ў 2020 годзе ён без дазволу адміністрацыі Першамайскага раёна размясціў у сацсетцы "Вконтакте" сваё фота з бел-чырвона-белым палотнішчам на плячах. Гэтае фота суд цаніў як несанкцыянаванае пікетаванне.
У якасці пакарання віцябляніну прысудзілі на падставе часткі 1 артыкула 24.23 КаАП 60 гадзінаў грамадскіх работ і канфіскацыю мабільнага тэлефона Xiaomi Redmi 7А.
Але старшыня абласнога суда Федзюкевіч выявіў, што санкцыі 1 часткі артыкула 24.23 КаАП не прадугледжваюць канфіскацыю маёмасці. Таму ён пастанавіў вярнуць смартфон уладальніку.
Цяпер Дэпартамент па гуманітарнай дзейнасці Кіравання справамі прэзідэнта павінен вярнуць гаджэт уладальніку ці кампенсаваць яго кошт.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.