Віцябляніна перадумалі судзіць за "экстрэмізм", а потым перадумалі перадумваць
![Віцябляніна будуць судзіць за падпіску на "экстрэмістаў" / pixabay.com](/sites/default/files/styles/gallery_main/public/2023-08/smartfon-0612.jpg.webp?itok=AQ_GIPHj)
Віцябляніна будуць судзіць за падпіску на "экстрэмістаў" / pixabay.com
Кастрычніцкі суд Віцебска спыніў адміністрацыйную справу супраць віцябляніна, якога вінавацілі ў захоўванні "экстрэмісцкіх матэрыялаў" з мэтай распаўсюду.
Як пішуць "Народныя навіны Віцебска", на мужчыну склалі пратакол за падпіску на некалькі тэлеграм-каналаў і YouTube-канал. Суддзя спыніў справу праз недаказанасць. У матэрыялах справы не было даных, што ўладальнік смартфона знаёміў іншых з "экстрэмісцкімі матэрыяламі" ў месенджары Telegram, а доступ пабочных асобаў быў абмежаваны паролем.
Пратэст на гэтае рашэнне падаў першы намеснік пракурора Віцебскай вобласці, і Віцебскі абласны суд падтрымаў яго. У абласным судзе звярнулі ўвагу, што "экстрэмісцкая прадукцыя" захоўвалася на асабістай YouTube-старонцы віцябляніна ў адкрытым доступе. Гэтую старонку прагледзелі 155 раз.
У выніку справу адправілі на новы разгляд — зноў у Кастрычніцкі суд Віцебска, але да новага суддзі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.