Ветэрынары Украіны: Беларусь нам пакуль не дала афіцыйны адказ па сітуацыі са свіннямі
Забарона на ўвоз беларускай свініны — гэта меры засцярогі ад распаўсюду магчымага захворвання. Пра гэта Еўрарадыё паведамілі ў Дзяржаўнай ветэрынарнай і фітасанітарнай службе Украіны.
Нагадаем, што 7 траўня Украіна забараніла ўвоз свініны з Беларусі. Нагодай стала адсутнасці афіцыйнай інфармацыі наконт здарэння на свінакомплексе “Усходні” ў Баранавіцкім раёне.
Пра гэта Еўрарадыё распавёў намеснік дэпартамента па ветэрынарнай медыцыне Украіны Дзмітрый Мароз.
Мароз: “Кажуць, што быццам бы рэпрадуктыўна-рэспіраторны сіндром. Але мы напісалі запыт у ветэрынарную службу Беларусі, дзе просім патлумачыць інфармацыю аб прынятых мерапрыемствах. І сапраўды маштаб мерапрыемстваў у вас нас уражвае і насцярожвае! І адсутнасць інфармацыі патрабуе ад нас прыняцця мер”.
Украінцы кажуць, што забарону на ўвоз свініны з Беларусі яны здымуць, як толькі атрымаюць адказ ад беларускага боку. Яны чакаюць, каб беларускія калегі афіцыйна пацвердзілі ці абверглі інфармацыю пра ўспышку афрыканскай чумы.
Фота — zihia.net
