Удзельнікі нарады ў Лукашэнкі пацвердзілі гутарку "пра бабло і мерсэдэсы"
![Удзельнікі нарады ў Лукашэнкі пацвердзілі гутарку "пра бабло і мерсэдэсы"](/sites/default/files/styles/gallery_main/public/2023-08/bablo-1912.jpg.webp?itok=SIPMpZ6h)
Удзельнікі нарады ў Аляксандра Лукашэнкі пацвердзілі праўдзівасць запісаў Уладзіміра Дражына, які занатаваў словы пра "бабло" і "мерсэдэсы", перадае Радыё "Свабода".
18 снежня ў кіраўніка дзяржавы прайшла нарада па летніх відах спорту. Найбольшы рэзананс атрымаў запіс пра бабло, мерсэдэсы і цёлак, які трапіў у відэасюжэт АНТ. Як высветліла nn.by, запісы рабіў былы віцэ-прэм’ер і амбасадар у Літве Уладзімір Дражын.
Галоўная трэнерка нацыянальнай зборнай па мастацкай гімнастыцы, намесніца старшыні Беларускай асацыяцыі гімнастыкі Ірына Ляпарская кажа, што слова "мерсэдэсы" гучала ў гаворцы пра высокі спартовы вынік: дасягнуў нечага — маеш права жыць па сродках.
"Прэзідэнт усё правільна сказаў: раней ездзілі на "мерсэдэсах", а цяпер не ездзяць, бо няма чым пахваліцца. Ягоная логіка зразумелая: няхай спачатку пакажуць вынік, заробяць, а потым усё гэта мець будуць. Не раздаваць авансы, а ўзнагароджваць толькі за рэальную працу. Я ў гэтым сэнсе яго цалкам падтрымліваю", — патлумачыла Ляпарская.
Старшыня Беларускай федэрацыі лёгкай атлетыкі Вадзім Дзевятоўскі, як перадае "Свабода", таксама распавёў, што "бабло" і "мерсэдэсы" гучалі падчас гаворкі пра больш ашчаднае выдаткоўванне бюджэтных сродкаў.
"Зразумела, кожны пачутае ўспрымае па-свойму, але важны сам кантэкст. Не было такога: жыраваць ці не жыраваць. Гаворка пра тое, што дадатковых грошай на спорт, магчыма, не будзе. Бо калі правільна расставіць прыярытэты, дастаткова і наяўных сродкаў", — удакладніў Дзевятоўскі.
А вось пра "цёлак" ніхто ўзгадаць не змог.