У Варшаве пратэставалі супраць расійскіх вайсковых базаў у Беларусі (фота)

Да дыпламатычнага прадстаўніцтва Расіі прыйшло каля 15 чалавек з беларускімі нацыянальнымі сцягамі і плакатамі супраць размяшчэння ў Беларусі расійскіх войскаў. Таксама ў амбасаду быў перададзены адпаведны зварот.

Акцыю арганізавалі кампанія "Разам для Беларусі", рух салідарнасці "Разам" і фундацыя "За свабоду і дэмакратыю".

Як паведамляла Еўрарадыё, днямі акцыі пратэсту супраць расійскіх вайсковых базаў у Беларусі прайшлі ў Мінску і Магілёве.  

Нагадаем, што планы размясціць на тэрыторыі Беларусі расійскую авіябазу ў красавіку 2013-га агучыў расійскі міністр абароны Сяргей Шайгу. У снежні дзяжурнае звяно з чатырох расійскіх знішчальнікаў Су-27 прызямлілася на аэрадроме 61-й знішчальнай авіябазы ў Баранавічах. Разам з імі з Расіі перабазаваўся і тэхнічны персанал.

Дарэчы, на тэрыторыі Беларусі ўжо знаходзяцца расійскія вайсковыя аб’екты: Вілейская база сувязі і радыёлакацыйная станцыя “Волга” каля Ганцавічаў.