У Сірыі збілі чарговы расійскі верталёт, усе вайскоўцы загінулі (відэа)

У Сірыі збіты чарговы расійскі верталёт, усе вайскоўцы загінулі. Здарэнне адбылося 1 жніўня ў правінцыі Ідліб. Ваенна-транспартны верталёт Мі-8 вяртаўся на базу Хмеймім пасля дастаўкі гуманітарнай дапамогі ў горад Алепа, калі быў збіты ў выніку абстрэлу баевікамі з зямлі. Як інфармуе РІА "Новости", загінулі тры чальцы экіпажу і два афіцэры Цэнтра прымірэння варагуючых бакоў у Сірыі.

Інфармацыю пра 5 загінулых расіян пацвердзіў прэс-сакратар прэзідэнта Расіі Дзмітрый Пяскоў, які спасылаецца на дадзеныя Мінабароны РФ. Ён адзначыў, што яны "загінулі гераічна", спрабуючы адвесці верталёт, "каб мінімізаваць ахвяры на зямлі".

У інтэрнэце з'явіліся фота і відэа, знятыя мясцовымі жыхарамі на месцы падзення Мі-8. Між іншым, яны дэманструюць і знойдзеныя дакументы расіян.

За апошні месяц гэта ўжо другі збіты ў Сірыі расійскі верталёт. 9 ліпеня каля Пальміры баевікі збілі верталёт Мі-35, загінулі два расійскія лётчыкі. У Сірыі знаходзіцца абмежаваны расійскі кантынгент вайскоўцаў, якія аказваюць дапамогу сірыйскім урадавым войскам у барацьбе з тэрарыстычнымі фармаваннямі "Ісламскай дзяржавы".