У Наваполацку на прыпынку за заўвагу пра курэнне збілі трох жанчын
![У Наваполацку на прыпынку за заўвагу пра курэнне збілі трох жанчын](/sites/default/files/styles/gallery_main/public/2023-08/fist-bump-1195446_960_720.jpg.webp?itok=kyXJJ2Oe)
У Наваполацку на прыпынку грамадскага транспарту каля могілак за заўвагу пра курэнне збілі трох жанчын. Як інфармуе прэс-служба віцебскай міліцыі, здарэнне адбылося яшчэ ўдзень 24 жніўня. На прыпынак са сваім знаёмым прыйшла 33-гадовая жанчына, яна закурыла цыгарэту. Там жа ў той момант чакалі аўтобус тры жанчыны ва ўзросце 52, 69 і 72 гадоў. Адна з іх зрабіла заўвагу жанчыне, якая курыла. У адказ яна пачула нецэнзурную лаянку, пачалася сварка, а пасля і бойка. Пацярпелі ўсе тры жанчыны, якія абурыліся курэннем на прыпынку.
Выпадковы мінак выклікаў міліцыю, але калі яна прыехала, усе ўдзельнікі канфлікту селі ў аўтобус. Там і затрымалі зламысніцу, якая знаходзілася ў стане алкагольнага ап'янення. Дарэчы, раней яна не мела праблем з законам. Цяпер жа па факце хуліганства распачатая крымінальная справа.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.