У Мінску сілавікі збілі журналіста, але крымінальнай справы не будзе
![У Мінску сілавікі збілі журналіста, але крымінальнай справы не будзе](/sites/default/files/styles/gallery_main/public/2023-08/2e128a49-5f20-4389-b063-859487375f6f_w1023_r1_s.jpg.webp?itok=RAS2gJx4)
Следчы камітэт паведаміў пра вынікі праверкі па факце збіцця журналіста Антона Трафімовіча. У той дзень, 15 ліпеня, да ЦВК стаяла вялізная чарга людзей, якія падавалі скаргі на нерэгістрацыю кандыдатам у прэзідэнты Віктара Бабарыкі. Трафімовіч гэта асвятляў для Радыё Свабода.
"Калі я выйшаў з вуліцы Мяснікова на Нямігу, каля мяне прыпыніўся мікрааўтобус, адкуль выбеглі 6-7 чалавек, двое ў форме АМАПу, астатнія — у цывільным, — расказваў журналіст. — Мне закруцілі рукі за спінай... Пры затрыманні моцна стукнулі па носе".
Ён успамінае, што на яго руках былі кайданкі, з носа цякла кроў, а сілавікі ніяк на гэта не рэагавалі.
Праз гадзіну Антона Трафімовіча адпусцілі з Заводскага РУУС. Ён напісаў заяву ў Следчы камітэт з патрабаваннем распачаць крымінальную справу супраць сілавікоў, якія парушылі ягоныя правы як журналіста. Адказ прыйшоў праз чатыры месяцы: склад злачынства не знайшлі, таму крымінальнай справы не распачалі.
"Было б наіўна разлічваць на нешта іншае, — кажа Трафімовіч. — Асабліва пасля таго, як сотням людзей зь цяжэйшымі траўмамі адмовілі ў крымінальных справах супраць сілавікоў".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.