У Мінску не задаволеныя тлумачэннямі французаў, называюць іх ноту “адпіскай”
![У Мінску не задаволеныя тлумачэннямі французаў, называюць іх ноту “адпіскай”](/sites/default/files/styles/gallery_main/public/2023-08/994129990ria715.jpg.webp?itok=PaMr3nXl)
Скандальная гісторыя з нядаўнім вобшукам хакеістаў, трэнераў і ўрача беларускай зборнай на вакзале ў Парыжы не заціхае. Як паведамляла Еўрарадыё, здарэнне адбылося 3 траўня падчас пераезду зборнай з Бардо ў Парыж, дзе яна выступае на чэмпіянаце свету. МЗС Беларусі запатрабаваў ад французскага боку тлумачэнняў і прабачэнняў, быў выкліканы амбасадар Францыі. Аднак у інфармацыі, якая 5 траўня з’явілася на сайце амбасады Францыі, даволі туманна тлумачацца прычыны вобшуку, згадваецца “барацьба супраць допінгу ў спорце вышэйшых дасягненняў”, адзначаецца, што ініцыятыву праявіла пракуратура Парыжа. Ніякіх прабачэнняў французы не прынеслі.
Адказваючы на пытанне БЕЛТА, начальнік упраўлення інфармацыі, прэс-сакратар МЗС нашай краіны Дзмітрый Мірончык адзначыў, што беларускі бок не задаволены атрыманымі тлумачэннямі. “Перададзеная нота з’яўляецца ў лепшым выпадку фармальнай адпіскай, якая не ўтрымлівае, акрамя дэкларацый агульнага характару, ніякай інфармацыі, якая б змястоўна абгрунтоўвала дзеянні французскіх уладаў”, — кажа Мірончык. Паводле яго слоў, адносіны французскага боку і да беларускай хакейнай зборнай, і да афіцыйнага пратэсту МЗС Беларусі “не можа быць ахарактарызавана інакш, як пагардлівае і выбарачнае”.
У Мінску не лічаць інцыдэнт вычарпаным і чакаюць прабачэнняў французаў за іх “недапушчальнае абыходжанне з беларускімі спартсменамі”.