У Маскве абвінавацілі Польшчу ў развязванні Другой сусветнай вайны
![У Маскве абвінавацілі Польшчу ў развязванні Другой сусветнай вайны](/sites/default/files/styles/gallery_main/public/2023-08/klincevic-0209.jpg.webp?itok=m0gemqyr)
Польшча сама справакавала Геманію на напад у 1939 годзе. Так расійскі сенатар Франц Клінцэвіч пракаментаваў тлумачэнні польскіх уладаў пра тое, чаму Расію не запрасілі на мемарыяльныя мерапрыемствы, прысвечаныя пачатку Другой сусветнай вайны.
Намеснік міністра замежных спраў Польшчы Шыман Шыманоўскі паведаміў, што расійскія ўлады не зацікаўленыя ў захаванні духу гістарычнай праўды.
У адказ на гэта ў інтэрв'ю радыёстанцыі "Говорит Москва" член камітэта Савета Федэрацыі па абароне і бяспецы Франц Клінцэвіч выступіў з нечаканай заявай.
"Вядома, вінаватая і сама Польшча, і геапалітычная абстаноўка так складалася. Падзеі 1939-га года і паводзіны Польшчы справакавалі Германію на гэты напад. І адбылося тое, што адбылося. Іх (польская. — Рэд.) здрадніцкая палітыка напярэдадні 39-га года прывяла да таго, што здарылася тое, што здарылася", — заявіў Клінцэвіч.
Гэтая заява, між іншага, супярэчыць высновам Нюрнбергскага трыбунала.
Як паведамлялася раней, прадстаўнікі беларускага кіраўніцтва атрымалі запрашэнне на мемарыяльныя мерапрыемствы ў Варшаву, аднак не паехалі. Нашу краіну прадстаўляў амбасадар Уладзімір Чушаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.