У гарадскім судзе сёння разглядаецца апеляцыя па “справе прафсаюзаў”
У Мінскім гарадскім судзе сёння пераглядаецца прысуд па “справе прафсаюзаў”. Разгляд касацыйнай скаргі лідараў незалежнага прафсаюзу РЭП Генадзя Фядыніча і Ігара Комліка пачнецца ў 10.00.
Прысуд па “справе РЭП” быў вынесены Савецкім судом Мінска ў жніўні 2018. Фядыніча і Комліка прызналі вінаватымі ва ўхіленні ад выплаты падаткаў у буйным памеры і асудзілі да чатырох гадоў хатняй хіміі з забаронай займаць кіруючыя пасады цягам пяці гадоў.
Фядыніч і Комлік просяць суд адмяніць прысуд і спыніць крымінальную справу.
У жніўні 2017 года Дэпартамент фінансавых расследаванняў правёў ператрусы дома ў Фядыніча і Комліка, а таксама ў офісе прафсаюза РЭП і цэнтральным офісе Беларускага незалежнага прафсаюза ў Салігорску. Прафсаюзных лідараў затрымалі, але праз пэўны час вызвалілі пад падпіску аб нявыездзе.
Суд вырашыў, што Фядыніч і Комлік адкрылі ад імя прафсаюза рахункі ў літоўскім банку, куды паступалі грошы. Паводле інфармацыі Следчага камітэта, у 2011 годзе ад нерэзідэнтаў Беларусі на іх рахунак паступіла 140 тысяч еўра. Нявыплачаныя падаткі, паводле разлікаў Камітэта дзяржкантролю, склалі каля 23 тысяч рублёў.
