У Дзень незалежнасці Украіна вярнула з расійскага палону 115 сваіх вайскоўцаў
Вызваленыя з расійскага палону ўкраінскія вайскоўцы / Telegram
Украінскія ўлады пацвердзілі, што ў Дзень незалежнасці ва Украіну з расійскага палону вярнуліся 115 вайскоўцаў. Гэта адбылося падчас 55-га абмену палоннымі пры пасярэдніцтве Аб'яднаных Арабскіх Эміратаў.
Іх абмянялі па формуле “115 на 115” на расійскіх вайскоўцаў, якіх захапілі падчас наступлення ў Курскай вобласці. Як паведамляе міністэрства абароны Расіі, цяпер яны знаходзяцца на тэрыторыі Беларусі.
Паведамляецца, што ўсе вернутыя – жаўнеры тэрміновай службы, матросы і сяржанты, якія трапілі ў палон яшчэ ў першыя месяцы поўнамаштабнага ўварвання Расіі ў 2022 годзе.
Украінскія ўлады змаглі вызваліць 9 асуджаных расійскімі судамі, трох памежнікаў, 6 нацгвардзейцаў з гарнізона аховы Чарнобыльскай АЭС, а таксама 82 абаронцы Марыупаля. Паўсотні іх іх удзельнічалі ў абароне “Азоўсталі”.
Многія з былых палонных маюць праблемы са здароўем праз раненні. Усе яны атрымаюць псіхалагічную дапамогу, пройдуць лячэнне і праграму рэінтэграцыі.
