У цэнтры Адэсы сепаратысты ўзводзяць барыкады
На Кулікова поле, дзе стаяць палаткі антымайдана, прывезлі пясок. Яго ўкладаюць у будаўнічыя поліэтыленавыя мяхі і складаюць з іх барыкады.
Агароджу вышынёй каля 1 метра ладзяць па перыметры пляцоўкі, на якой знаходзіцца намётавы гарадок. Сюды ж звезлі шмат аўтамабільных шын, якія таксама выклалі каля мяхоў, перадае УНІАН.
У Адэсе недалёка ад чыгуначнага вакзала, на Куліковым полі, прарасійскія актывісты ўсталявалі каля 10 намётаў, у якіх пастаянна знаходзяцца людзі. На Куліковым полі па нядзелях ладзяцца прарасійскія мітынгі.
Дарэчы, заклікі пабудаваць барыкады гучалі яшчэ 7 красавіка на прарасійскім мітынгу на Куліковым полі. Перад гэтым некалькі актывістаў заклікалі "разабрацца" са сходам прыхільнікаў адзінай Украіны, ісці на захоп абласной адміністрацыі і будынка абласнога ўпраўлення СБУ.
Фота — 048.ua
