Вы тут

У БХМД канваіраў пакінулі без крэслаў: гісторыя з "Тэлеграма" пацвердзілася

Скрыншот агляду доктарам / "Тэлеграм"

Па "Тэлеграме" другі дзень гуляе гісторыя пра тое, як дактары не далі крэслаў канвойным міліцыянерам, якія вартавалі збітага мужчыну. Больш за тое: адзін з дактароў, убачыўшы міліцыянераў, стаў на калені тварам да сцяны, з рукамі за галавой, і сказаў: "Кажуць, так можна чацвёра сутак стаяць".

Да паведамлення прымацаванае фота экрана з анамнезам: маўляў, пацыент скардзіўся, што 18 кастрычніка, у дзень вялікага пратэставага маршу, яго збілі супрацоўнікі міліцыі.

Гісторыя падобная на матывацыйны фэйк. А згаданы ў анамнезе мяшок на галаве прымушае сумнявацца ў ёй яшчэ больш. Бо ў гэтым няма сэнсу: людзі расказваюць, як іх збіваюць пры затрыманні і без усялякіх мяшкоў. А такіх выпадкаў, каб чалавека вазілі па Мінску з мяшком на галаве, у перыяд пасля выбараў амаль не было.

Аднак, нягледзячы на ўсе сумневы, у Еўрарадыё атрымалася пацвердзіць, што гісторыя адбылася ў сапраўднасці.

Скрыншот з ТГ-канала "Белые халаты"

У Бальніцы хуткай медыцынскай дапамогі нам пацвердзілі, што загадчык аддзялення і міліцыянеры сапраўды паспрачаліся пра крэслы. Мы даведаліся імёны медыкаў, якія так выказалі свой пратэст.

— Там былі настроены іх [міліцыянераў. — Еўрарадыё] наогул вытурыць, але не атрымалася. Крэслы пазабіралі, каб яны не сядзелі. Міліцыянеры нават выклікалі свайго начальніка, які туды прыязджаў і разбіраўся. Чалавека, якога прывезлі міліцыянеры, медыкі вырашылі не аддаваць і трымаць да апошняга, каб ён зноў не трапіў ім у рукі, — расказвае Еўрарадыё медык.

Па словах фельчара хуткай дапамогі, якая мае зносіны з супрацоўнікамі БХМД, абстаноўка там цяпер напружаная.

— Цяпер ідуць рэпрэсіі. У БХМД кіраўніцтва складае спісы тых, хто ходзіць "за апазіцыю", каб з імі не працягваць кантракт. Там цяпер на іх ідзе ціск па поўнай, — расказвае доктар.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.