У Беларусі больш за 3,5 тысячы кантактаў першага ўзроўню з хворымі COVID-19
У паліклініцы / Марыя Вайтовіч, Еўрарадыё
Па стане на пятніцу, 10 красавіка, у Беларусі пад наглядам знаходзіцца больш за 3,5 тысяч кантактаў першага ўзроўню з людзьмі, якія захварэлі COVID-19. Пра гэта ў суботу падчас прэс-брыфінгу экспертнай місіі СААЗ распавёў міністр аховы здароўя Беларусі Уладзімір Каранік.
"Гэта розныя тэрміны назірання, — патлумачыў міністр. — Нехта яго завяршае, хтосьці толькі быў выяўлены".
Каранік патлумачыў, што гаворка ідзе пра беларусаў, якія назіраюцца дома. Тых, хто знаходзіцца пад наглядам у шпіталях, цяпер выпісваюць для далейшых хатніх назіранняў.
"За суткі па Рэспубліцы Беларусь было выпісана 716 кантактаў першага ўзроўню, 124 — застаюцца пад наглядам", — сказаў Каранік.
Па словах міністра, на сёння ў нашай краіне існуе тры катэгорыі крыніц заражэння каранавірусам: завазныя выпадкі, кантакты першага ўзроўню (і іх зараз больш) і выпадкі захворвання без яўнага эпідачага.
"Гэта значыць, чалавек нікуды не выязджаў, не кантактаваў з інфікаваным пацыентам. Мы стараемся выявіць крыніцу інфекцыі, каб яе лакалізаваць ", — растлумачыў міністр.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
