Траўмы “Зорнага цырку”

Прычынай здарэння стала страхавая лонжа, якая абарвалася падчас выконвання Наталляй акрабатычнага нумару.

Распавядае прадзюсер праекту “Зорны цырк” Сяргей Хоміч:

“Гэта здарылася падчас трэніроўкі. З прычыны таго, што лопнуў страхуючы трос. Ніякіх цяжкіх практыкаванняў Наташа ў гэты дзень не выконвала, таму што гэта быў першы дзень трэніровак. Нечакана для сябе яна згубіла раўнавагу.

Практыкаванне выконваецца такім чынам: на плячах мужчыны трымаюць такую вузкую дошку, на якой стаіць артыст ці артыстка і выконвае якія-небудзь гімнастычныя практыкаванні.

Наташа спрабавала сябе, спрабавала стаяць на гэтай дошцы, у гэты час і адбылося надзвычайнае здарэнне: пералом левай рукі са змяшчэннем, прамянёвая костка ў раёне кісці”.

Па словах самой Наталлі, зараз яна адчувае сябе добра. Самым жахлівым для яе было само здарэнне. Зразумела, што падзенне з вышыні амаль у 2 метры магло мець больш цяжкія наступствы для Радзінай.

Наталля Радзіна: “Прыстойная вышыня. Хлопцы трымаюць гэтую дошку на плячах, атрымліваецца рост чалавека, плюс на ёй падкідваюць. У мяне была лонжа (страхоўка), яна мяне моцна не трымала — так, на той выпадак, калі я міма прызямлялася.

Я памятаю, як я лячу і гэтая вяроўка разам са мною (ці нават раней за мяне) падае ўніз. Я разумею, што яна мяне не трымае. Напэўна, ад гэтага страху я расслабіла цела, не зарыентавалася і ўпала.

Я сябе адчуваю, як і павінен адчуваць сябе чалавек, у якога зламаная рука. Але, у прынцыпе, не так страшна, як я меркавала. Думала, што гэта куды больш балюча і цяжка”.

Як нам паведаміў прадзюсер праекта, усе ўдзельнікі шоў застрахаваныя. Але сама Наталля пакуль не займаецца пытаннем атрымання грошай. Па словах пацярпелай, ёй пакуль не да гэтага.

Радзіна: “Я пакуль пра гэта не думаю і нічога не раблю, мне пакуль не да гэтага. Спачатку прыйду да сябе, пакуль рука яшчэ баліць, я нават гэтыя ночы не спала. Пакуль толькі бальнічныя даведкі афармляю”.

Наталля вымушана пакінуць праект. Як нам паведаміў Сяргей Хоміч, з такімі траўмамі далейшы ўдзел у телешоў немагчымы.

Дарэчы, гэта не першае надзвычайнае здарэнне ў “Зорным цырку”. Нагадаем, што не так даўно хатняя гаспадыня Вольга Баранская атрымала пералом хвасца, ві-джэй Люся Лушчык набыла расцяжэнне мышцаў жывата.

А вось тэлевядучаму Сяргею Савіцкаму не пашанцавала больш. Ён, як і Наталля Радзіна, выбыў з праекту з прычыны пералому —толькі не рукі, а нагі.