Танцы — да 23:00: праз COVID-19 зноў абмяжоўваюць час работы ўстаноў
![Лунінецкі рэстаран "Юна" / rest-yuna.ulcraft.com](/sites/default/files/styles/gallery_main/public/2023-08/full_qj9xcrlm.jpg.webp?itok=Opyl7BTL)
Лунінецкі рэстаран "Юна" / rest-yuna.ulcraft.com
У красавіку 2020 года ўлады многіх раёнаў Беларусі ўвялі абмежаванні, звязаныя з COVID-19. Каранціну на ўзроўні краіны не было — але ў кожнай вобласці (і ў некаторых раёнах) дзейнічалі свае меры па барацьбе з каранавірусам.
Падобна, тая вясновая сітуацыя паўтараецца ў Беларусі восенню. У распараджэнні Еўрарадыё апынуліся дакументы, па якіх абмежаваны час работы ўстаноў у Лунінецкім раёне. У рашэнні Лунінецкага райвыканкама напісана: "Функцыянаванне дыскатэк, начных клубаў, забаўляльных устаноў пасля 23:00 гадзін адмяніць". Тэрмін выканання — "па меры неабходнасці з улікам эпідэміялагічнай сітуацыі". Мы мяркуем, што падобныя абмежаванні ўводзяцца і ў іншых раёнах.
"Як правіла, дарослыя людзі каля 23 гадзін разыходзяцца"
Еўрарадыё датэлефанавалася да Лунінецкага раённага цэнтра гігіены і эпідэміялогіі і пагутарыла з загадчыкам аддзела гігіены Ігарам Круглічам.
![Танцы — до 23:00: из-за COVID-19 снова ограничивают время работы заведений](/sites/default/files/styles/round_photo/public/paragraphs/round_photo/61258b516ab67978a3cb31c351cdf371595x6511320754717.jpg.webp?itok=ecMNi_7k)
— Чаму да 23:00? Таму што гэта пазіцыя была яшчэ раней у красавіку ў рэкамендацыях Міністэрства аховы здароўя. Органы дзяржсаннагляду распрацоўвалі сумесна з зацікаўленымі асобамі гэты план мерапрыемстваў. Мы ініцыявалі работу такіх устаноў да 23:00. У рэкамендацыях канкрэтнага часу не пазначана, але органы выканаўчай улады вырашылі так, — тлумачыць ён.
Па словах гігіеніста, уладальнікі бараў і клубаў нязгодныя з такім рашэннем.
— У нас не так шмат устаноў грамадскага харчавання, якія гэтае рашэнне закранула. Так, яны пярэчылі. Але я хачу сказаць, што прадстаўнікі названых устаноў, напэўна, максімальна робяць захады, каб нічога не рабіць. Яны не хочуць выконваць кратнасць прыборкі: трэба прыходзіць нагадваць кожны раз. Вось як пры правядзенні дыскатэкі правесці дыстанцыяванне? Адзін з добрых варыянтаў быў прыпыніць [дзейнасць устаноў у позні час. — Еўрарадыё]. Хоць гэта і радыкальны метад, і мы не прыхільнікі такога падыходу.
![Танцы — до 23:00: из-за COVID-19 снова ограничивают время работы заведений](/sites/default/files/paragraphs/image/fullhg3gezvp.jpg)
Чыноўнік лічыць, што танцы неабавязкова ладзіць да поўначы.
— А чаму не правесці да 23:00? Як правіла, дарослыя людзі каля 23 гадзін разыходзяцца. Рашэнне райвыканкама абавязковае для выканання, — працягвае Кругліч. — Але паколькі мы ўбачылі, што ў рэкамендацыях Міністэрства аховы здароўя [канкрэтны] час [работы ўстаноў] не пазначаны, было прынята кансалідаванае рашэнне для таго, каб гэтую пазіцыю скарэктаваць па часе. У тым ліку з улікам меркавання прадстаўнікоў аб'ектаў грамадскага харчавання, уладальнікаў і ўласнікаў.
"Другую ўспышку каранавіруса мы ўжо не перажывём"
— Калі быў каранавірус, красавік — травень — чэрвень, у нас быў графік працы да 23:00. Супрацоўнікі проста выседжвалі гадзінны, каб можна было налічыць заробак. Перажылі гэты перыяд ледзь-ледзь. Страцілі некаторых работнікаў, таму што не маглі забяспечыць ім годны заробак. Думаю, што другую ўспышку каранавіруса мы ўжо не перажывём. Пачынаецца ацяпляльны сезон, летніх тэрас ужо няма, студэнты раз'ехаліся, — расказвае Еўрарадыё Вера, уладальніца рэстарана "Юна" — адзінай прыватнай установы ў Лунінцы, якая працуе дапазна.
Вера кажа, што ў райвыканкаме яе аргументы пачулі. Хутчэй за ўсё, днямі ўстанова вернецца да работы ў звычайным рэжыме — да трох гадзін ночы.
— У мяне цэлы кастрычнік — вяселлі, — працягвае Вера. — Цяпер рашэнне хочуць адмяніць. Афіцыйнай пастановы няма, але я хадзіла ў райвыканкам, гутарыла з кіраўніком асабіста. Сказалі, што рашэнне будзе перагледжана.
Прыватная ўстанова, якая працуе дапазна, засталася адна — гэта мы. У раёне адкрылі дыскатэку, але гэта ўстанова летняга тыпу, не ведаю, ці захочуць яны працаваць восенню.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.