Сярод 20 ахвяр стральбы ў каледжы ў Керчы 15 студэнтаў

Колькасць ахвяр стральбы ў політэхнічным каледжы ў Керчы вырасла да 20 чалавек, інфармуе ria.ru. Сярод іх 15 студэнтаў (11 — непаўналетнія) і 5 супрацоўнікаў навучальнай установы. Усе яны апазнаныя. У бальніцы знаходзіцца каля 40 чалавек, некаторыя ў цяжкім стане.

Трагічнае здарэнне адбылося ўдзень 17 кастрычніка. 18-гадовы навучэнец 4-га курсу Уладзіслаў Раслякоў узарваў у будынку самаробную бомбу (яшчэ адно выбуховае прыстасаванне пасля ліквідавалі сапёры) і адкрыў стральбу з паляўнічай стрэльбы (усе загінулыя маюць агнястрэльныя раненні). Калі выкарыстаў амаль усе патроны, хлопец застрэліўся. Яго цела знайшлі на другім паверсе ў бібліятэцы.

Спачатку крымінальную справу распачалі па артыкуле тэракт. Пасля, калі праваахоўнікі вывучылі ўсе абставіны, яе перакваліфікавалі на артыкул аб забойстве двух і больш асобаў.

Уладзіслаў Раслякоў жыў з маці — бацькі развяліся. У каледжы ён вучыўся з верасня 2015 года, спецыяльнасць — "Мантаж, наладка і эксплуатацыя электраабсталявання прамысловых і грамадзянскіх будынкаў". Праблем з законам у яго не было, праяваў агрэсіі з яго боку ніхто не заўважаў. Дазвол на паляўнічую зброю хлопец атрымаў восенню 2018-га, а значыць прайшоў праверку ў псіхіятра. Ён купіў 150 патронаў. Колькі з іх скарыстаў, пакуль невядома. І самае галоўнае — дагэтуль невядомы матыў Раслякова.