Суздальцаў: Крэдыту ад Еўразійскага банка для Беларусі не будзе
![Суздальцаў: Крэдыту ад Еўразійскага банка для Беларусі не будзе](/sites/default/files/styles/gallery_main/public/2023-08/suzdalcevvv.jpg.webp?itok=PxcHXqRI)
"Умацаванне ўзаемадзеяння, адсутнасць недаверу, развіццё інтэграцыйных працэсаў" — такія вынікі сустрэчы Аляксандра Лукашэнка і Уладзіміра Пуціна, калі чытаць сайты кіраўнікоў дзвюх краін. Агульныя словы без канкрэтыкі з адной лічбай: 6 мільярдаў долараў у бюджэце Саюзнай дзяржавы.
Але пра што дамовіліся на пасяджэнні Вышэйшага дзяржаўнага савета саюзнай дзяржавы і ці дадуць Беларусі крэдыт?
На сайтах кіраўнікоў краін пра крэдыт ні слова. Але адразу пасля сустрэчы gazeta.ru са слоў старшыні праўлення Еўразійскага банка развіцця піша, што крэдыту у два мільярды долараў пакуль не будзе.
Бо "Беларусь не выканала ўмовы. Не былі павышаныя тарыфы на паслугі жыллёва-камунальнай гаспадаркі, транспартныя паслугі, не цалкам рэалізаваная праграма прыватызацыі дзяржактываў, неабходных для стабілізацыі бюджэту і паляпшэння плацежнага балансу". А як жа павышаная камуналка, дарагі ліфт і цяпло?
![Суздальцаў: Крэдыту ад Еўразійскага банка для Беларусі не будзе](/sites/default/files/styles/round_photo/public/paragraphs/round_photo/chaly_1.jpg.webp?itok=iPwAHrpV)
"Усе умовы Беларусь даўно выканала, — адразу кажа эканаміст Сяргей Чалы, — Там ужо напрыканцы мінулага года не было ніякіх праблем. Яны цягнуць, бо могуць сабе дазволіць. Маўляў, пачакаем, пакуль яшчэ горш стане. Патрабаванні ў іх аналагічныя МВФ. Нічога звышнатуральнага там няма. Тут больш палітычны фактар, але мы не ведаем, пра што яны размаўлялі. Я бы чакаў гэты крэдыт у бліжэйшы час".
Крэдыту ад Еўразійскага банка развіцця Беларусь чакае больш за год. На думку Сяргея Чалага, ён нам проста неабходны, каб пагасіць іншыя запазычанасці.
![Суздальцаў: Крэдыту ад Еўразійскага банка для Беларусі не будзе](/sites/default/files/styles/round_photo/public/paragraphs/round_photo/suzdalcev.jpg.webp?itok=pOywzOqf)
Але "крэдыт не дадуць, ці дадуць вельмі не хутка", — такое меркаванне ў расійскага палітолага Андрэя Суздальцава:
"Крэдыту не будзе. Прычын тут шмат. Па-першае, з пункту гледжання кіраўніцтва Расіі, экспертаў, беларуская эканоміка, валютная сістэма краіны неадэкватная задачам, якія перад ёй стаяць. Яна не можа функцыянаваць у сучасным фармаце. Яе самастойны стан мінімальны. І уліванне ў яе крэдытаў не мае сэнсу. Сістэма разлічаная на ўтрыманскі падыход да знешніх рынкаў, знешніх рэсурсаў. Яна пабудаваная на спажыванні датацый. Гэта чорная дзіра для крэдытаў. Сітуацыя пагаршаецца і Беларусь пераўтвараецца ва ўсходнееўрапейскі варыянт Грэцыі".
Палітолаг звяртае ўвагу на тое, што нават авіябазу на тэрыторыі Беларусі кіраўнікі краін не ўзгадвалі.