Суд пакінуў Уладзіслава Баўмгертнера за кратамі

Скарга адвакатаў Баўмгертнера не была задаволеная, яны збіраюцца абскарджваць гэтае рашэнне ў Вярхоўным судзе.

Нагадаем, 26 жніўня ў мінскім аэрапорце затрымалі кіраўніка "Уралкалія" Уладзіслава Баўмгертнера пасля сустрэчы з прэм'ерам Міхаілам Мясніковічам. Следчы камітэт Беларусі заявіў, што гендырэктар “Уралкалія” нанёс шкоду нацыянальным інтарэсам Беларусі. Баўмгертнеру было выстаўленае абвінавачанне ва злоўжыванні ўладай і службовымі паўнамоцтвамі. Яму пагражае да 10 гадоў пазбаўлення волі з канфіскацыяй маёмасці. Следчы камітэт паведаміў, што страты па справе Беларускай калійнай кампаніі ацэньваюцца на 100 млн долараў. Баўмгертнер знаходзіцца ў следчым ізалятары КДБ.

Суд у Мінску над гендырэктарам "Уралкалія", верагодна, будзе закрытым. Пра гэта ў пятніцу паведаміў адвакат Дзмітрый Гарачка. Пры гэтым ён падкрэсліў, што "ніякіх асаблівасцяў разгляду дадзенай крымінальнай справы не будзе, усё будзе ў адпаведнасці з Крымінальна-працэсуальным кодэксам Беларусі", інфармуе "Интерфакс-Запад".

Гарачка таксама адзначыў, што расследаванне крымінальнай справы ў адносінах Уладзіслава Баўмгертнера можа працягнуцца 1,5 гады. 

Фота — ria.ru