Суд над Касінеравым: Фатаграфавацца з гарадавым можна, але так, каб не зневажаць
На судзе над Вячаславам Касінеравым дапыталі сведкаў — міліцыянтаў, якія яго затрымалі пасля перформансу са скульптурай гарадавога.
Нагадаем, хлопец накінуў пятлю на шыю скульптуры. За гэта яго вінавацяць у хуліганстве. Максімальнае пакаранне, якое пагражае Касінераву, — тры гады пазбаўлення волі. Суд над ім ідзе ў Маскоўскім судзе Мінска.
На судзе Касінераў патлумачыў, што свой перформанс учыніў пасля звестак пра масавыя затрыманні грамадскіх актывістаў.
На судзе дапыталі міліцыянта Рамана Семяненку і вайскоўца ўнутраных войскаў Дзмітрыя Булгака, якія затрымалі актывіста пасля перформансу, перадае Радыё "Свабода".
Паміж адвакатам і Булгаком адбыўся наступны дыялог:
— А якія менавіта дзеянні абвінавачанага былі правапарушэннем?
— Тое, што ён накінуў пятлю. Нічога нельга наклейваць, накідваць.
— А фатаграфавацца са скульптурай можна?
— Можна, але так, каб не зневажаць.
— А дзе гэта напісана? Адкуль звычайнаму мінаку гэта ведаць?
Сведка пацвердзіў, што папераджальнай шыльдачкі або агароджы каля помніка няма. Таксама ён сказаў, што Касінераў пры затрыманні не супраціўляўся і нічога не выкрыкваў, таму чапляць на яго кайданкі не было патрэбы.