Стваральніцу Іўеўскага музея нацыянальных культур арыштавалі на 10 сутак

Стваральніцу і першага дырэктара Іўеўскага музея нацыянальных культур Рэгіну Лавор пакаралі 10 суткамі арышту, паведамляюць праваабаронцы. Падставай для чарговага пакарання зрабілася "парушэнне рэжыму адбыцця "хатняй хіміі".

Лавор знаходзіцца на "хатняй хіміі" з 1 снежня. Суд прызнаў яе вінаватай у абразе начальніка Іўеўскага РАУС і старшага інспектара. Яна пакінула пра іх каментары ў телеграм-каналах. Жанчыне прысудзілі два гады "хатняй хіміі".

Пасля абвяшчэння прысуду мясцовая міліцыя арганізавала за ёй пільны кантроль. Толькі за снежань да Рэгіны Лавор прыходзілі 23 праверкі.

"Адзін раз супрацоўнік Іўеўскага РАУС у гадзіну ночы вазіў мяне на медыцынскі агляд на наяўнасць у крыві алкаголю. Паказала 00 праміле. Шукаюць матывы, каб паздзекавацца і даць парушэнне", — расказала яна некалькі тыдняў таму.

Акрамя таго, яе мужа, які больш за 20 гадоў быў начальнікам Іўеўскага вузла сувязі ("Белтэлекам"), прымусілі перайсці на пасаду інжынера ў гэтай жа арганізацыі. А пазней пачалі і зусім патрабаваць, каб ён звольніўся.

Праваабаронцы прызналі Рэгіну Лавор палітзняволенай.