Стала вядома, як будзе выглядаць надмагільны помнік пісьменніку Змітраку Бядулю
Так будзе выглядаць будучы помнік / АНТ
Яго ўсталююць на Усходніх могілках Мінска.
Стала вядома, як будзе выглядаць надмагільны помнік пісьменніку Змітраку Бядулю, які ўсталююць на Усходніх могілках Мінска. Эскіз распрацаваны вядомым беларускім скульптарам Сяргеем Гумілеўскім. Яго паказалі ў рэпартажы тэлеканала АНТ.
Асновай стала асіметрычная гранітная пліта, якая нагадвае ніву пад ветрам. На ёй — рэльефная бронзавая выява Змітрака Бядулі. Дарожку каля помніка зробяць з брукаванкі, як сімвала складанага жыццёвага шляху пісьменніка.
Нядаўна Дзяржаўны музей гісторыі беларускай літаратуры зноў адкрыў збор грошай на надмагільны помнік пісьменніку-нашаніўцу Змітраку Бядулю (сапраўднае імя Самуіл Плаўнік, 1886 — 1941) — неабходна сабраць 12500 рублёў. У лістападзе 2020 года на Усходніх могілках Мінска адбылося перапахаванне яго парэшткаў, прывезеных з Казахстана.
