Стала вядома, хто першым узяўся абараняць чалавецтва ад ШІ — #ІхНоравы

13/03/2024 - 14:15

#ІхНоравы / Калаж Улада Рубанава

Не толькі ў Беларусі і Расіі адбываецца ўсякая дзікасць. За мяжой — таксама, але, здаецца, гэтая дзікасць звязаная з Расіяй.

На даўняга саюзніка Аляксея Навальнага напалі непадалёк ад яго дома ў Літве. Леаніда Волкава збілі малатком. У яго зламаная рука, а па назе ўдарылі малатком 15 разоў. Літоўская выведка мяркуе, што атаку, імаверна, арганізавала і зладзіла Расія.

Пра іншыя — дзікія і не вельмі — навіны чытайце ў нашым рэгулярным аглядзе.

Голад у Газе: людзі паміраюць ад недаядання і абязводжвання

ААН не кідае спробаў даставіць прадукты харчавання ў паўночную, самую разбураную частку сектара Газа. Гэтым разам яны выкарыстоўвалі новы сухапутны маршрут. Дапамогу паспрабуюць перадаць такім чынам, каб такую неабходную людзям ежу і лекі не перахапіў ХАМАС.

А яшчэ з Кіпра морам адправілі лодку з харчаваннем. Але сушай — хутчэй, таму сухапутныя калідоры такія важныя.

Ціск сусветнай супольнасці на Ізраіль расце. Ад Тэль-Авіва патрабуюць даць гуманітарным арганізацыям свабоднейшы доступ да палестынскіх тэрыторый, бо на Газу насоўваецца голад. Паводле звестак ААН, як мінімум 576 тысяч чалавек у Газе, а гэта чвэрць насельніцтва сектара, — у адным кроку ад голаду.

Міністэрства аховы здароўя Газы (пад кіраваннем ХАМАС) паведамляе, што прынамсі 27 чалавек паміралі ў шпіталях ад голаду і абязводжвання. Большасць з іх — дзеці.

Ізраіль настойвае, што ніякіх абмежаванняў на аб'ём дапамогі, якую можна даставіць у Газу, няма. Ён вінаваціць агенцтва ААН у тым, што тыя не ў стане размеркаваць дапамогу сярод людзей, якія ў ёй маюць патрэбу.

Абараніць чалавецтва ад ШІ

Еўрапейскі парламент зацвердзіў першую ў свеце усеабдымную праграму, якая павінна страхаваць чалавецтва ад рызык, звязаных з развіццём штучнага інтэлекту.

Закон аб штучным інтэлекце ранжыруе прадукты, якія вырабляюцца з ужываннем ШІ, паводле ступені небяспекі. У залежнасці ад гэтага выбіраюць захады кантролю.

Такім чынам ЕС стаў у авангардзе абароны чалавека ад імклівага развіцця тэхналогій. Іншыя краіны таксама прымалі законы аб ШІ, але закон ЕС аб штучным інтэлекце — гэта першы і адзіны ў свеце звод абавязковых патрабаванняў да кампаній, якія займаюцца распрацоўкай. Астатнія могуць даганяць.

Мільярдэр хоча пабудаваць "Тытанік II"

Аўстралійскі мільярдэр кажа, што плаваць на "Тытаніку" нашмат весялей, чым сядзець дома і лічыць свае грошы. Вось такія вось забавы ў іх там у Аўстраліі.

Клайв Палмер паабяцаў пабудаваць судна, якое будзе ўдвая перавышаць памеры сапраўднага "Тытаніка". То-бок гэта будзе копія лайнера — толькі нашмат большая. І мы ўсе спадзяемся, што і лёс у яго будзе нашмат лепшы. Мэта мільярдэра — пабудаваць "карабель кахання, найвышэйшага стылю і раскошы".

Стало известно, кто первым встал на защиту человечества от ИИ — #ИхНравы

Паводле планаў, лайнер будзе выглядаць так / Blue Star INE

Гэтая мара ў яго з'явілася не сёння, а 10 гадоў таму, калі ў гатэлі Ritz ён упершыню абвясціў пра свае планы. Але цяпер, кажа мільярдэр, ужо дакладна-дакладна. І што грошай у яго хопіць, каб пабудаваць лайнер, які не ў 2, а ў 10 разоў пераўзыходзіць "Тытанік"!

Насамрэч гэта выдатная тэма для рэфлексій. Мільярдэру 70 гадоў, і ён наўпрост прызнаўся: ніякавата ад думкі, што памрэш, нічога не зрабіўшы.

"Усё, што трэба для шчасця ў жыцці, я знайшоў — у мяне ёсць нехта, хто мяне любіць, мне ёсць дзе спаць начамі і ў мяне дастаткова грошай, каб добра паесці. А ўсё астатняе — гэта ілюзія, як гульня ў гольф", — кажа мільярдэр.

А яшчэ Палмера кранае гісторыя кахання Джэка і Роўз.

"Мы спадзяемся, што "Тытанік II" можа паслужыць каталізатарам для адраджэння некаторых нашых каштоўнасцяў — і мы спадзяемся, гэта прывядзе да міру", — дадаў мільярдэр-летуценнік.

Сапраўднага карабля пакуль няма, але ўжо ёсць 3D-рэндэрынг — гэта значыць, ілюстрацыі, на якіх можна паглядзець, як будуць выглядаць дзевяць палубаў "Тытаніка-2".