СК кажа, што выявіў больш за 70 "удзельнікаў тэрарыстычнай арганізацыі Nexta"

СК кажа, што выявіў больш за 70 "удзельнікаў тэрарыстычнай арганізацыі Nexta"

Следчы камітэт працягвае рапартаваць, як расследуе падзеі 2020 года, якія афіцыйна характарызуюцца як "масавыя беспарадкі".  

У каментары БЕЛТА начальнік упраўлення Следчага камітэта па горадзе Мінску Сяргей Паско расказаў, што падрыхтоўка і арганізацыя масавых вулічных пратэстаў вялася з дапамогай інтэрнэт-рэсурсаў. Кіравалі гэтымі інтэрнэт рэсурсамі, па яго словах, "фармаванні".

"У публікацыях змяшчаліся экстрэмісцкія матэрыялы, напоўненыя заклікамі да дзеянняў, накіраваным на прычыненне шкоды нацыянальнай бяспецы Беларусі, і супрацьпраўным паводзінам", — кажа следчы.

Паско заяўляе, быццам адно з самых вядомых фармаванняў, цяпер прызнанае "тэрарыстычнай арганізацыяй", стварыла больш за 80 інтэрнэт-рэсурсаў. "Толькі ў траўні бягучага года следчымі сталіцы накіраваныя ў суды іскавыя заявы аб прызнанні інфармацыйнай прадукцыі экстрэмісцкімі матэрыяламі больш за 55 інтэрнэт-рэсурсаў", — дзеліцца ён рэпрэсіўнай статыстыкай.

Таксама Паско паведамляе, быццам следчыя выявілі больш за 70 "удзельнікаў тэрарыстычнай арганізацыі Nexta". 

"Зусім нядаўна следчым упраўленнем УСК па горадзе Мінску ва ўзаемадзеянні з ГУБАЗіК МУС затрыманыя адміністратары, якія адказвалі за інфармацыйнае ўздзеянне на жыхароў Гомельскай, Віцебскай і Брэсцкай вобласці, а таксама за кансалідацыю на іх тэрыторыі радыкальнага руху. Затрыманыя супрацоўнічаюць са следствам, даюць прызнальныя паказанні", — гаворыць ён.

Паско называе шэраг артыкулаў Крымінальнага кодэкса, якія могуць інкрымінаваць адмінам пратэсных рэсурсаў. Сярод іх — "тэрарыстычныя" (арт. 130, арт. 290-2, арт. 290-3), што ў сённяшняй Беларусі можа пагражаць смяротным пакараннем.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі