ЗША выдаткавалі 76 млн долараў на падтрымку свабоды ў інтэрнэце
Пра гэта заявіла журналістам афіцыйная прадстаўніца дзярждэпартамента Вікторыя Нуланд.
Па яе словах, якія перадае ВВС, гэтая сума была выдаткаваная за апошнія чатыры гады. Гаворка ідзе пра доўгатэрміновыя праграмы, якія дапамагаюць людзям у краінах з абмежаваным доступам да інтэрнэту знайсці шляхі выхаду ў Сеціва і зразумець, што гэта з'яўляецца адной з фундаментальных свабодаў. У якасці прыкладу, Нуланд назвала Сірыю.
Адміністрацыя прэзідэнта ЗША Барака Абамы абвясціла падтрымку свабоды ў інтэрнэце і развіццё сацыяльных медыя аднымі са сваіх асноўных прыярытэтаў. Сёлета на фінансаванне адпаведных праграм адміністрацыя плануе выдаткаваць яшчэ 25 млн долараў.