Журналісты правялі “Бажынкі-2012”
Штогадовы фэст прыняў хутар Барок.
На аграэтнасядзібу мастака і музыкі Алеся Лося на Валожыншчыне завіталі некалькі дзясяткаў сябраў Беларускай асацыяцыі журналістаў.
Тэмай сёлета абралі пірацтва. Юрыст Андрэй Бастунец распавёў пра аўтарскае права ў галіне журналістыкі. Удзельнікі падзяліліся на пірацкія каманды і паспаборнічалі на спартовых пляцоўках ды ў інтэлектуальных гульнях. У залік пайшлі міні-футбол, валейбол, стральба з лука, перацягванне ліны, эстафеты, а таксама адгадванне пірацкіх тэкстаў паводле малюнкаў і турнір на лепшую прэзентацыю каманды, дэвіз і гімн.
Пераможцы атрымалі прызы і кубкі для кавы з выявай талісмана — “Жабкі БАЖа”. Увечары першага дня даў канцэрт і паказаў фаер-шоў гурт “Нагуаль”. Гаспадар сядзібы сыграў на дудзе і праспяваў некалькі песень, сабраных у фальклорных экспедыцыях.
Як заўсёды, удзельнікі пакінулі ў базе дадзеных фэсту адбіткі пальцаў (уся далонь, колер на выбар).
Надвор’е спрыяла святу да апошняга. Надзвычайнай была колькасць вос, але ніхто не пацярпеў.