Украінскія парламентары адклікаюць галасы з-пад "моўнага закону"
Тым часам абаронцы ўкраінскай мовы правялі ўжо другую ноч на прыступках Украінскага дома.
Пра гэта са спасылкай на народную дэпутатку Лесю Арабец паведамляе агенцтва УНІАН.
Акцыя пратэсту супраць скандальнага закону "Пра асновы дзяржаўнай моўнай палітыкі" пачалася ў аўторак з таго, што некалькі дэпутатаў ад апазіцыі абвясцілі галадоўку пад Украінскім домам. У сераду неаднаразова адбываліся сутычкі паміж праваахоўнікамі і пратэстоўцамі.
У чацвер зранку стала вядома, што чатыры чальцы фракцыі Народнай партыі адклікалі свае галасы з-пад "моўнага закону", прынятага 3 ліпеня. Кацярына Вашчук, Сяргей Церашчук, Васіль Шпак і Васіль Чэрній напісалі заявы на імя старшыні Вярхоўнай Рады Украіны Уладзіміра Літвіна.
Таксама раней свой голас адклікаў намеснік старшыні Вярхоўнай Рады Мікалай Таменка: яго карткай галасаваў, як выявілася, іншы народны дэпутат. Свой голас адклікаў дэпутат Ігар Паліца, бо ў момант галасавання знаходзіўся за мяжой.
Таксама зрабілі адпаведныя заявы тры дэпутата ад Партыі рэгіёнаў — Арэст Муц, Пятро Пісарчук і Васіль Чудноў, і дэпутат ад Народнай партыі Мікалай Шаршун.
Фота — unian.net
