У Наваполацку затрымалі актывіста, які нёс ліст начальніку міліцыі
Мясцовы актывіст аргкамітэту па стварэнні партыі "Беларуская Хрысціянская Дэмакратыя" выйшаў з дому і адразу ж быў схоплены.
Сяргея Малашэнку каля пад'езда чакаў міліцэйскі аўтамабіль. Напярэдадні яго позвай выклікалі ў міліцыю (яе даслалі па пошце), аднак ісці туды ён не збіраўся.
Вось што распавяла Еўрарадыё віцебская абласная каардынатарка аргкамитэта БХД Таццяна Севярынец:
"Ён параіўся з мясцовымі праваабронцамі і наспісаў ліст да начальніка міліцыі, каб яму растлумачылі, чаму такая бязглуздая позва, юрыдычна неабаснаваная. І вось толькі панёс яго на пошту, яго і ўзялі".
Малашэнка паспеў сказаць па тэлефоне, што яго затрымалі з-за пікету, які праходзіў у Наваполацку 9 студзеня. Тады актывісты сфатаграфаваліся з партрэтамі палітвязня Алеся Бяляцкага на ганках гарадскога суду і каля гарадскога аддзела міліцыі.
Фота — з сацыяльных сетак