У Мінску за адзін мандат змагаюцца тры праўладныя кандыдаты!
Еўрарадыё адшукала акругі, прадказаць вынік выбараў у якіх не так і проста.
Ёсць такія выбарчыя акругі, дзе балатуюцца адразу некалькі… праўладных кандыдатаў! Ідуць адзін на аднаго.
“Шанцы на перамогу? Шчыра кажучы, мне складана іх ацаніць. Я першы раз удзельнічаю ў такім. Таму гаварыць аб шансах вельмі складана”, — кажа Ігар Бабок — дырэктар па ідэалагічнай працы кампаніі “Мілавіца”.
Назваць яго апазіцыйным кандыдатам складана. Ды і сам дырэктар па ідэалагічнай працы ў размове з карэспандэнтам Еўрарадыё аб апанентах улады адгукаецца не вельмі пяшчотна. Бабок балатуецца ў адной акрузе з дзейным дэпутатам — Мікалаем Самасейкам. Наракае на тое, што некаторыя дэпутаты не кажуць праўды пра свае прыбыткі (сам ён падаў звесткі пра 280 мільёнаў прыбытку за апошні год). Расказвае пра тое, што ў кампаніі яму ўскосна дапамагае… службовае становішча.
“Што грэх хаваць, калі ў жаночым калектыве гавару, што я прадстаўляю такое прадпрыемства, як “Мілавіца”, то пэўная цікавасць у іх адразу ўзнікае. Я вельмі спадзяюся, што ў памяці жанчын гэта застаецца”.
Акругаў, дзе балатуюцца па некалькі служачых дзяржаўных структур, больш за ўсё ў Мінску. У Аўтазаводскай акрузе, дзе балатаваўся лідар БНФ Аляксей Янукевіч, ідуць намеснік галоўнага інжынера аўтобуснага парка №6 Пётр Жалнер і кіраўнік прафсаюзнага камітэта на ліцейным прадпрыемстве МАЗа Сяргей Дудкін. Вазьмі здагадайся, хто пераможа?
Канкурэнцыя ў беларускіх выбарах сустракаецца не ўпершыню. У 2000 годзе, калі апазіцыя масава паздымалася з выбараў, у Пінску намеснік кіраўніка райвыканкама сапернічаў з намеснікам кіраўніка… брэсцкага аблвыканкама! А ў Баранавічах юрыст галоўнага ўпраўлення Міністэрства фінансаў выставіўся супраць намесніка начальніка мясцовага РУУС. Былі часы, нічога не скажаш.
У Свіслацкай акрузе разам з дацэнтам кафедры акушэрства Беларускай медыцынскай акадэміі паслядыпломнай адукацыі Аксанай Дражынай балатуецца дырэктар аўтобуснага парка нумар 2 Леанід Мажэйка. Таксама інтрыга. Праўда, акурат Мажэйка ў сваёй перамозе перакананы.
“Таму што за ўвесь час агітацыі, я не бачыў ніводнага пікета сваіх апанентаў. Каб нехта недзе стаяў і агітаваў”.
А самая інтрыгоўная мінская акруга – Купалаўская. Там балатуецца кіраўнік Ленінскага аддзела Дэпартамента аховы МУС Валерый Дашкоўскі, галоўны ўрач 18-ай паліклінікі Вадзім Касцюкоў і дзейная дэпутатка парламента Валянціна Леаненка. Ажно тры кандыдаты, якіх можна назваць праўладнымі!
У Полацку Еўрарадыё знайшло акругу, дзе старшыня Полацкага савета дэпутатаў Наталля Гуйвік сапернічае з… вядомым тэлевядучым, супрацоўнікам канала АНТ Аляксеем Міхальчанкам.
Размаўляць пра свае шансы на перамогу ў выбарах з карэспандэнтам Еўрарадыё Міхальчанка не захацеў. Ці то накаркаць пабаяўся, ці то ў перамогу больш не верыць.
“Што грэх хаваць, калі ў жаночым калектыве гавару, што я прадстаўляю такое прадпрыемства, як “Мілавіца”, то пэўная цікавасць у іх адразу ўзнікае. Я вельмі спадзяюся, што ў памяці жанчын гэта застаецца”.
