У Мінску пройдзе гандбольны марафон, які прэтэндуе трапіць у Кнігу Гінэса
У марафоне возьмуць удзел каля тысячы чалавек.
7 чэрвеня ў 14 гадзін у Мінску стартуе 32-гадзінны гандбольны марафон, які прэтэндуе на рэгістрацыю ў расійскай Кнізе рэкордаў "Дзіва" і ў Кнізе рэкордаў Гінэса, паведаміў намеснік старшыні Беларускай федэрацыі гандбола Іван Семяненя на прэс-канферэнцыі ў панядзелак.
Паводле яго слоў, з самага пачатку планаваўся 24-гадзінны марафон, але такое мерапрыемства раней ужо праводзілася ў Нідэрландах.
У марафоне возьмуць удзел 47 каманд. Узрост гульцоў ад 5 да 78 гадоў. Фіналам будзе адборачны матч мужчынскага чэмпіянату Еўропы-2012 Беларусь—Данія, які пройдзе на "Мінск-Арэне".
Каб рэкорд быў зарэгістраваны, перапынак паміж матчамі не павінен перавышаць пяці хвілін, паведамляе БелаПАН.
