Таццяна Севярынец: Нас з Паўлам караюць за шматлікія скаргі
Суддзя адмовіла Паўлу Севярынцу ў сустрэчы з маці і святаром.
Суддзя суду Заводскага раёна Мінску Жана Брысіна, якая 11 траўня будзе весці судовы працэс над сустаршынём аргкамітэту па стварэньні партыі "Беларуская хрысціянская дэмакратыя" Паўлам Севярынцам, адмовіла яму ў сустрэчы з маці і святаром.
Пра гэта Еўрарадыё распавяла маці Паўла Севярынца Таццяна Севярынец:
“Сёння зранку я атрымала два лісты з Заводскага суду горада Мінска. Першы ліст, дзе мне было сказана, што спатканне з сынам можа быць толькі пасля агучвання прысуду, гэта першае. А другое, што вырашэнне гэтага пытання аб сустрэчы з святаром, яно не ў кампетэнцыі суддзі. І два гэтыя лісты за подпісам суддзі Жанны Брысінай, якая і будзе судзіць Паўла”.
Таццяна Севярынец выказала меркаванне, што такім чынам іх з Паўлам караюць за шматлікія скаргі і адмову Паўла Севярынца ад пачатку супрацоўнічаць са следствам.
Нагадаем, сустаршыня аргкамітэту па стварэнні партыі "Беларуская Хрысціянская Дэмакратыя" Павел Севярынец падчас мінулай выбарчай кампаніі быў кіраўніком штабу іншага сустаршыні БХД, кандыдата ў прэзідэнты Віталя Рымашэўскага. Севярынец быў затрыманы ў ноч пасля выбараў і ўвесь гэты час знаходзіцца ў СІЗА КДБ, так званай “амэрыканцы”. У турме Павел адмаўляецца даваць паказанні.
Разам з Севярынцам будуць судзіць Ірыну Халіп і Сяргея Марцалева. Усіх абвінавачваюць у арганізацыі і падрыхтоўцы дзеянняў, якія груба парушаюць грамадскі парадак, або актыўным удзеле у іх.
