Шведская амбасада пакуль працуе ў звычайным рэжыме
У сераду стала вядома, што МЗС Беларусі адклікае сваё пасольства ў Швецыі і прапануе шведскаму боку зрабіць да 30 жніўня тое самае.
Прадстаўнік шведскай дыпмісіі ў Беларусі паведаміў РІА "Новости", што пра ўсё ён і яго калегі даведаліся з сённяшняга паведамлення МЗС Беларусі. "Пакуль працуем у звычайным рэжыме", — кажа ён.
Паводле словаў супрацоўніка шведскай амбасады, працягваецца выдача візаў і праца з наведвальнікамі. Ён адзначыў, што пасля ад'езду з Мінску ўсіх працаўнікоў амбасады Швецыі беларускім грамадзянам давядзецца афармляць візы ў іншых краінах, напрыклад, у Расіі.
Нагадаем, на мінулым тыдні стала вядома, што ўлады Беларусі не працягнулі акрэдытацыю амбасадару Швецыі ў нашай краіне Стэфану Эрыксану. Пачалася сапраўдная дыпламатычная вайна паміж Мінскам і Стакгольмам. У МЗС Беларусі падкрэсліваюць, што гаворка пра разрыў дыпламатычных адносінаў не ідзе.
