Штодня на аднаго дэпутата дзяржава траціць 1 мільён рублёў

120110 Luka6uk Deputaty.mp3

У бюджэце краіны на 2012 год Еўрарадыё знайшло, колькі грошай сёлета пойдзе на Палату прадстаўнікоў і Савет Рэспублікі. Сума не маленькая — 64 мільярды 81 мільён рублёў. Дэпутатаў у нас 110, сенатараў — 68. На кожнага з іх прыпадае па 360 мільёнаў у год альбо па 1 мільёне ў дзень з гэтых закладзеных у бюджэт мільярдаў.

"На што штодня траціцца гэты “дэпутацкі” мільён?" — цікавіцца Еўрарадыё ў дэпутата Валянціны Леаненкі. Але яна прызнаецца, што пры вывучэнні бюджэту ўвагу найперш звяртала на тое, колькі грошай ідзе на сацыяльныя патрэбы.

Валянціна Леаненка: “Вось гэты артыкул... неяк ён па-за маёй увагай прайшоў. Што тычыцца ўтрымання дэпутатаў — неяк я не звяртала на гэта ўвагі, таму я нават ніяк не магу пракаментаваць: куды ідзе, як ідзе — гэта зараз могуць быць толькі мае здагадкі”.

Кіраўнік упраўлення інфармацыйна-аналітычнай працы Палаты прадстаўнікоў Мікалай Ліс, пачуўшы ад Еўрарадыё тое ж пытанне, разгубіўся.

Мікалай Ліс: “Вы ведаеце, гэта ўсё: і будынак, і астатняе... Я не ведаю нічога па гэтым пытанні — гэта фінансы...”

У бухгалтэрыі Палаты прадстаўнікоў увогуле адмовіліся размаўляць з журналістамі без дазволу не менш як спікера.

І толькі старшыня камісіі па ахове здароўя, фізічнай культуры, справах сям’і і моладзі Алег Вялічка паспрабаваў падлічыць разам з карэспандэнтам Еўрарадыё, на што ідуць гэтыя грошы. Пачалі з дэпутацкага заробку.

Алег Вялічка: “Ну, заробак, калі палічыць: дэпутатаў 110 і, па-мойму, чалавек 170 супрацоўнікаў сакратарыята — атрымліваецца, прыблізна, 300. Калі памножыць на нейкі сярэдні заробак, мільёны 4-5 у сярэднім, то вось вам ужо палова той сумы, пра якую вы кажыце. Гэты заробак жадае быць значна лепшым — нават 5 мільёнаў няма”.

Працягваючы падлікі, называе іншыя артыкулы, на што ідзе штодзённы дэпутацкі мільён з бюджэту-2012.

Алег Вялічка: “Камандзіровачныя — таксама самыя значныя выдаткі. А што больш? Ну, нейкія ж яшчэ выдаткі ёсць. Набыццё нейкага там стала, крэсла, яшчэ нечага — як у любой установе. На ўтрыманне будынка, на набыццё нейкага абсталявання. Хаця на гэта, я ведаю, не так і шмат выдзяляецца. Ніхто тут не шыкуе, паверце мне! Нармальныя ўмовы, але залатых унітазаў няма”.

І народныя абраннікі хочуць яшчэ больш павялічыць расходы на сваё ўтрыманне. Яны ўжо прынялі ў першым чытанні законапраект "Аб унясенні зменаў у закон "Аб статусе дэпутата Палаты прадстаўнікоў, сябра Савета Рэспублікі Нацыянальнага сходу". Там прадугледжваецца стварэнне адмысловага дэпутацкага фонда. З якога, да прыкладу, будуць кампенсавацца выдаткі на камандзіроўкі для памочнікаў дэпутатаў.