Пра сустрэчу па выбары адзінага кандыдата прэтэндэнты даведаліся ад СМІ

Уладзімір Някляеў і Яраслаў Раманчук толькі ад СМІ даведаліся пра тое, што сёння яны збяруцца з астатнімі прэтэндэнтамі, каб выпрацаваць мадэль абрання адзінага кандыдата. Як паведамляў учора прэтэндэнт ад Партыі БНФ Рыгор Кастусёў, такая сустрэча павінна была прайсці адразу пасля размовы з міністрамі замежных спраў Польшчы і Нямеччыны. Нават называўся дакладны час – 2 лістапада, 16.50.

“Учора на сайце са здзіўленнем я прачытаў, што мы сёння сустракаемся яшчэ і самі. Пасля сустрэчы з міністрамі замежных спраў Нямеччыны і Польшчы, – здзіўляецца Ўладзімір Някляеў. – Прычым, гэта выглядае так, што гэтыя міністры нам скажуць, пальцам пакажуць, каго мы тут павінны выбіраць і мы гэтым зоймемся. Такой дамоўленасці не было. Можа, хто-небудзь дамовіўся без мяне, можа быць”.

І дадаў, што пакуль была дамоўленасць сустрэцца ў пятніцу, запрасіць на гэтую сустрэчу журналістаў і ў іх прысутнасці гаварыць “пра нейкі крок да магчымага аб’яднання па вылучэнні адзінага кандыдата праз плошчу”. Мітынг прызначаны на 24 лістапада, калі будуць аб’яўленыя вынікі рэгістрацыі прэтэндэнтаў у прэзідэнты.

Гэта заява Някляева выклікала абурэнне прэтэндэнта ў прэзідэнты ад Партыі БНФ Рыгора Кастусёва.

Рыгор Кастусёў: “Я ж, здаецца, памяць яшчэ не згубіў! Падчас сустрэчы ў амбасадзе Літвы, мы там 1 гадзіну 45 хвілін чакалі прэзідэнта Далю Грыбаўскайтэ ў пецярых: я, Раманчук, Рымашэўскі, Саннікаў і Някляеў. За гэты час мы дамовіліся, што пасля здачы падпісных лістоў, мы сустрэнемся ў гэтым жа самым фармаце, кале нехта да нас далучыцца, то няхай далучаецца, і працягнем нашы перамовы. Так, натуральна, мы не вызначалі тэматыку перамоў, але тое, што мы прызначылі адказным Някляева за арганізацыю гэтай сустрэчы – гэта дакладна!”.

І заявіў, што пра сустрэчу ў пятніцу, чуе ў першыню. Праўда, пасля прызнаўся, што дамаўляючыся ў амбасадзе Літвы пра будучую сустрэчу для перамоў па выхадзе на адзінага, яны не называлі дакладны яе дзень. І адкуль ўзялася яго ўпэўненасць у тым, што гэта будзе 2 лістапада ў 16.50 не патлумачыў. Маўляў, дамовіліся, што сустрэча для перамоў адбудзецца адразу, як толькі будзе нагода. А менавіта сустрэча з міністрамі і ёсць такой спрыяльнай нагодай.

Абурэння Кастусёва не зразумеў і намеснік старшыні Аб’яднанай грамадзянскай партыі Яраслаў Раманчук. Па яго словах, ніякай дамоўленасці пра пачатак перамоў пасля сённяшняй сустрэчы сапраўды не было. Ды і не гатовыя прэтэндэнты яшчэ да іх.

Яраслаў Раманчук: “Такія рэчы павінны абгрунтоўвацца, абмяркоўвацца. У людзей ёсць нейкія планы. Як так можа быць?! Мы сёння паглядзім адзін на аднаго і высветлім, што Кастусёў меў на ўвазе. Ён так дзіўна інтэрпрэтуе размову пры чаканні. Не было там абмеркавання мэтаў і дата не называлася – нічога!”

Затое пры магчымасць сустрэчы прэтэндэнтаў у прысутнасці журналістаў для пачатку нейкай размовы пра адзінага ў пятніцу, Раманчук чуў. І ў яго планах час на гэтае мерапрыемства запланаваны, расказаў палітык Еўрарадыё.

Фота: svaboda.org