Польская і ізраільская амбасады адзначылі ўгодкі антынацысцкага паўстання
Для гэтага дыпламаты склікалі ў Мінску канферэнцыю, падчас якой згадалі падзеі 70-гадовай даўніны, калі адбылося паўстанне ў Варшаўскім гета.
Падчас сустрэчы выступілі польскі гісторык, доктар Марцін Урыновіч. Ён зачытаў даклад “Паўстанне ў Варшаўскім гета. Гісторыя і праблематыка”. З дапамогай скайпа на сувязь з Іерусаліма выйшаў кандыдат палітычных навук Вітольд Медзікоўскі.
Амбасадары Польшчы і Ізраіля, Лешак Шарэпка і Іосіф Шагал, адзначылі, што такія трагічныя старонкі гісторыі нельга забываць.
Паўстанне ў Варшаўскім гета пачалося ў канцы красавіка 1943 года. На той момант там жыло толькі каля 56 тысяч чалавек. Больш за 300 тысяч былі вывезеныя з гета і забітыя ў лагерах смерці. У выніку большасць будынкаў на тэрыторыі гета была знішчаная, а паўстанцы схопленыя альбо ліквідаваныя. Выратавацца ўдалося толькі некалькім сотням людзей.
Падчас сустрэчы ў польскай амбасадзе пасол Ізраіля ў Беларусі Іосіф Шагал адзначыў, што паўстанцы Варшаўскага гета абаранялі не столькі ўласнае жыццё, колькі гонар яўрэйскага народа.
На здымку: Помнік героям гета ў Варшаве. Фота — wikimedia.org
