Сурапін размаўляў са шведамі. Але — пасля публікацыі фотак з мядзведзікамі

Магчыма, менавіта гэтыя бяскрыўдныя паведамленні і сталі прычынай цікавасці да хлопца з боку беларускіх спецслужбаў.

“Тэрмінова! Тэрмінова! ТЭРМІНОВА! Трэба знайсці курсы ангельскай мовы. Год таму з італьянцамі цудоўна размаўляў. Сёння шведаў ледзь разумею:'(”, — пісаў Антон Сурапін “вКонтакте” ўвечары 5 ліпеня, праз дзень пасля публікацыі фота з мядзведзікамі на сваім сайце.

А парай гадзін раней, у 14:12, там жа фатограф парадаваўся за вялікую цікавасць да ягонага сайта, якую выклікала публікацыя фота ад нейкага “ананіма”: “Вось здымаеш матэрыялы кожны дзень — некалькі сотняў людзей паглядзіць. А даслаў учора нейкі ананім 6 фотак, дык некалькі тысяч наведвальнікаў”. У каментах да гэтага допісу журналіст распавядае, што шведы прасілі яго расказаць нейкія падрабязнасці: “Шведы прасілі падрабязнасцяў, толькі якіх, я не ведаю”. Можна меркаваць, што замежнікі самі знайшлі Сурапіна, каб атрымаць ад яго нейкую інфармацыю.

"Шведы сапраўды выходзілі з ім на кантакт. Але не тыя, якія лёталі над Беларуссю. Гэта былі шведскія журналісты, якія цікавіліся дэталямі перфомансу. Андрэй адказаў ім, што падрабязнасцяў не ведае, а здымкі атрымаў з фэйкавай паштовай скрыні", — распавядае Еўрарадыё сябра Антона Сурапіна.

Распавядаючы пра гэтую перапіску, знаёмыя Антона Сурапіна просяць выдаляць іх паведамленні і не раскрываць імёнаў.

"Фоткамі цікавіліся журналісты аднаго са шведскіх выданняў, якое абвінавацілі ў ілжывай інфармацыі наконт "дэсанту". І яны шукалі сведкаў тут, на Беларусі. Маўляў, вось сведкі, вось мядзведзікі, вось доказы, што мы не хлусілі", — дадае сяброўка фатографа.

Нагадаем, што журналіста Антона Сурапіна затрымалі ў пятніцу 13 ліпеня, больш як праз тыдзень пасля акцыі шведаў. Ён быў адным з першых, хто апублікаваў фота з “мядзведзікамі-дэсантнікамі”. Перад затрыманнем дома ў Сурапіна супрацоўнікі КДБ правялі ператрус. У панядзелак 16 ліпеня стала вядома, што журналіста падазраюць у саўдзеле ў незаконным перасячэнні мяжы. Тэрмін яго затрымання быў падоўжаны да 10 дзён. Сябры заўважылі, што падчас знаходжання журналіста пад вартай яго акаунт "вКонтакте" некалькі разоў быў актыўны.